Compostela, 8 de outubro do 2021 – A xornada de Curtocircuíto contará hoxe coa presencia do director e guionista francés Yann Gonzalez, protagonista do Foco de esta XVIII edición.
Yann Gonzalez manterá un coloquio co público trala proxección dos seus traballos, Perez, Les Vacances continuent e Un couteau dans le cœur. O pase terá lugar ás 20:15 horas no Teatro Principal.
Dentro da sección Longas x Curto, o cineasta Kikol Grau manterá un encontro co público tras a proxección de Las cuatro esquinas de Madrid, o seu documental sobre a historia do punk. O pase terá lugar en NUMAX ás 22:00 horas.
Pola noite, ás 22:00 horas no Salón Teatro, Cruhda presenta un espectáculo xunto á artista visual galega Adataberna e o artista e investigador sonoro, músico electrónico e compositor galego Artur M Puga será o encargado de abrir o concerto.
Hoxe ademais terá lugar a segunda das mesas redondas desta edición, que abordará como a publicidade e o cinema se entremesturan á hora de afrontar a creación audiovisual. En Impacto / xesto: publi, cinema ou cintas de vídeo participarán Cris Trenas e Santos Bacana (Little Spain) xunto a Nacho Villar e Luis Rojo (BRBR FIlms). Un conxunto de xoves que nos últimos tempos destacaron no panorama estatal e internacional polos seus traballos para artistas como C.Tangana, Territoire, Cálido Lehamo, Emelvi y marcas como Pornhub, Volkswagen, PayPal, American Airlines, NBA2K, Fruit Of The Loom, Domino’s ou BestBuy; e que agora enfróntanse a un salto ao mundo do cinema persoal.
A xornada complétase co penúltimo pase da sección oficial Radar, que inclúe a proxección de The Rabbit Hunters (Guy Maddin, Evan Johnson, Galen Johnson); Dead Flash (Bertrand Mandico); Taxidermisez-moi (Marie Losier); e Deus ex Machina (Anssi Kasitonni); a mostra dos traballos dos franceses Jonathan Vinel e Caroline Poggi na sección Púlsar, que manterán un encontro co público trala proxección; e a terceira proxección dos mellores traballos estatais na sección Penínsulas (La mano que canta, de Alex Reynolds e Alma Söderberg; A Minor Figure, de Jamie Weiss e Michael McCanne; e Zerua blu, de Lur Olaizola) con coloquio posterior cos e coas cineastas.
