Vedra, 27 de marzo do 2019 – O próximo 14 de abril Vedra celebrará un ano máis a Exaltación do Viño da Ulla na que será a trixésimo novena edición e que onte era presentada en rolda de prensa.
San Miguel de Sarandón é o lugar no que se abrirá as doce do mediodía a Praza do Viño e a mostra dos viños da D.O Rías Baixas correspondentes a subzona do Ulla. Será a unha da tarde cando comecen os discursos, nomeamentos e pregón co saúda do alcalde de Vedra Carlos Martínez Carrillo.
Manquiña un novo amigo da bota
Manuel Prieto Comesaña, Manquiña, é o elixido este ano para dar o pregón en representación da Orde dos amig@s da bota do Viño da Ulla. Tamén será o momento de entregar os premios do concurso cata celebrado o día anterior.
Viño Son
Tras as verbas será o momento da música, Odaiko e Vanesa Muela faranse cargo da sesión vermú. A orquestra Xacobeo completará o cartel do mediodía.
Tarde de folclore e rock
As catro, mentres seguro que algúns están rematando a comida, os grupos de música e baile tradicional Os Laxeiriños, Os Campiños, e as Pandereteiras Dedaleiras, todos da Asociación Cultural San Campio, porán de novo música á festa. Con eles estará tamén o obradoiro de cultura tradicional Ultreia.
Manquiña, ademais de exercer de pregoeiro, abrirá a tarde ao rock co seu grupo Los Fabulosos Weekend a partir das cinco e media. A charanga O Recobio de Vaamonde, A Requinta da Laxeira e de novo a orquestra Xacobeo encargaranse de que ata ben entrada a noite a música non falte.
Moito que disfrutar
Ademais do programa xa descrito, ao longo de todo o día celebraranse sorteos de lotes de produtos da Ulla. Daranse premios as peñas como á máis numerosa ou á máis festeira. Poderase visitar o espazo promocional no que os concellos da subzona da ribeira do Ulla mostrarán os seus produtos e valores. E por suposto haberá polbo, filloas, chourizos, empanadas e, aínda que non é comida, amplos aparcadoiros igualmente importantes.
A XXXIX Exaltación do Viño da Ulla no sería posible sen o patrocinio do Concello de Vedra, a Xunta de Galicia, a Deputación da Coruña, a Denominación de orixe Rías Baixas e a asistencia do gabinete de comunicación do GDR Terras de Compostela.
