Compostela, 04/08/2026 – O Feito a man é un dos mellores festivais de Compostela e posiblemente un dos menos valorados. Cada ano os concertos sorprenden e un descobre artistas e desfruta da música na rúa como en ningún sitio.
A selección de artistas do Feito a man non acolle aos nomes máis coñecidos pero a calidade é sempre unha das súas características. Hai que engadir a experiencia que moitos acumulan; é o caso de Ruxe Ruxe que poderemos ver esta noite e que leva máis de 20 anos de rock ás costas.
A XXIII edición do festival Feito a man chegará ata o 22 de agosto. Na presentación a organización, Asociación Cultural Cidade Vella, puxo o foco no valor da diversidade, do compromiso cultural e do papel que o festival leva máis de dúas décadas desempeñando na cidade.
A directora do festival, Ángeles Porto, Destacou a ilustración do cartel desta edición, obra de Gloria Pavía, unha artista polifacética moi vinculada ao Feito a Man desde hai anos. Explicou que a imaxe xira arredor dos espellos, un elemento simbólico de especial relevancia para as persoas creadoras, e destacou tamén a presenza de Narf nun deses reflexos, coincidindo co décimo aniversario do seu pasamento.
Pola súa banda, Jesús Pais, director da Asociación Cultural Cidade Vella, reivindicou o papel dos establecementos hostaleiros como axentes culturais e sociais da cidade. Sinalou que os bares da zona vella non deben ser simplemente “bebedoiros de alcohol”.
A concelleira da Capital Cultural, Míriam Louzao, destacou a aposta do festival pola calidade artística e pola diversidade, subliñando que é posible combinar a presenza de artistas galegos con propostas chegadas doutros lugares do mundo. Salientou, ademais, que a riqueza cultural reside precisamente na convivencia de ritmos, estilos e expresións diferentes, e puxo en valor un festival que vai moito máis alá da música ao integrar distintas disciplinas artísticas e contribuír á construción dunha cidade máis aberta e diversa.
A programación contará con recoñecidas propostas galegas como Ruxe-Ruxe, Allo Negro, Seixo, Saibran, Muaré, Mother Pearl & The Rockin’ Rebels ou Océano Eskizo; e algunhas chegadas doutras latitudes como Yosvany Terry (Cuba/os EUA), Alma Micic Trío (Os EUA/Galiza), Mirla Riomar & Marcel Vallès (Brasil/Catalunya), Manu Sija e Vic Nogueira & Naxo Ganin (Arxentina) ou Chopchop ( O Reino Unido).
Fiel ao seu carácter aberto e ecléctico, Feito a man volverá transitar por estilos que van dende o jazz, o rock, o hard rock ou o blues ata a música tradicional, o reggae, a electrónica, o funk, o soul ou as músicas de raíz de distintos lugares do mundo.
A programación complétase cunha aposta polas artes escénicas, con espectáculos de improvisación teatral e musical, e cunha actividade de reflexión arredor do medio ambiente a través da proxección do documental A terra por gañar. Unha historia do ecoloxismo galego, seguida dun coloquio.
O festival está organizado pola Asociación Cultural Cidade Vella que, desde 1987, reúne establecementos de hostalaría da zona vella compostelá cun claro compromiso coa cultura e coa cidade. É posible grazas ao apoio do Concello de Santiago de Compostela e da Deputación da Coruña e conta, ademais, con diferentes empresas coas que vén colaborando nos últimos anos, entre as que destacamos Estrella de Galicia como cervexa oficial do festival.
Actualmente, os establecementos organizadores son Camalea, Modus Vivendi, Atlántico, Chocolate, O Pozo, Casa das crechas, Literarios, A Gramola, Borriquita de Belém, Xuntanza, A Reixa, Momo e O Galo D’ouro.
A Praza de Feixóo, a Rúa de Xelmírez, a Praza da Quintana ou San Paio de Antealtares son algúns dos catorce espazos da cidade histórica nos que se poderá gozar de música ao vivo.
