Ordes, 22 de febreiro do 2019 – Esta fin de semana, 23 e 24 de febreiro, terá lugar a XXI Festa do Lacón con Grelos no Mesón do Vento, en Ordes.
É unha das principais celebracións do municipio do concello e na que cada ano congréganse milleiros de persoas para participar e disfrutar dun amplo e variado programa. Como non había ser doutro xeito o protagonista é o lacón con Grelos e este ano serán arredor duns 2.500 quilos os que se preparen de cara ao domingo.
O recinto feiral abrirá as súas portas ás 10 horas albergando unha ampla mostra de gando e aves de raza autóctona, produtos do campo, artesanía, maquinaria agrícola, ademais dunha feira medieval.
A todo isto, o sábado, sumaráselle unha degustación de carne de cachena nos establecementos da zona a partir das 12 horas. Xa pola tarde, concretamente ás 16.30 horas, dará comezo a proba de agility canina e unha hora máis tarde o IV Encontro folclórico coa participación das agrupacións Sementes da Arte, Camiño Real de Poulo, Asociación Folclórico Cultural Veciños de Leira e as Pandeireteiras de Ardevento.
Xa de cara ao domingo ademais da degustación do prato protagonista da xornada haberá tamén unha mostra de cetrería, xuntanza cabalar e exhibición de vehículos 4X4. A partir das 11.30 horas terá lugar a primeira poxa de gando, e as probas de andadura e trote que se sucederán ata a tarde. Ademais, ás 12.30 horas, arrancará o concurso morfolóxico pura raza galega de eguas e cabalos. A xincana e a carreira de burros previstas para as 18 e 18.30 horas respectivamente porán o broche final a esta festa.
A XXI Festa do Lacón con Grelos está organizada polo Concello de Ordes e conta coa colaboración de Africor Coruña.
