O Consello da Xunta celebrado este luns autorizou a licitación da redacción dos proxectos para a construción de 71 vivendas en estes concellos.
O debate sobre a falta de vivenda pública na sociedade obriga ás administracións a recuperar décadas de esquecemento de esta necesidade. O Consello da Xunta de este luns da un pasiño ao autorizar a licitación da redacción de proxectos para novas vivendas na Estrada, Lalín e Teo.
Máis sobre vivenda en Lindeiros https://tinyurl.com/2ya7lr7m
A Sociedade de Vivenda Pública de Galicia (Vipugal) licitará os contratos da redacción de proxecto e dirección de obra para estas vivendas, que se construirán en tres parcelas cedidas por estes concellos.
En Teo a Xunta construirá 26 vivendas nunha parcela na rúa Cernadelo, na zona das Galanas-Calo, que ten unha superficie de 1.985 metros cadrados. O orzamento de licitación para a elaboración deste proxecto ascende a 259.224€.
No concello da Estrada, a Administración autonómica creará 28 novas vivendas públicas nunha parcela de 1.451 metros cadrados, concretamente na avenida de Vigo, e o contrato para a redacción deste proxecto sairá a licitación por importe de 257.083€.
En Lalín o Concello cedeu unha parcela na Rolda Leste-Agro de Lalín de Arriba, de 641 metros cadrados, na que se prevén crear 17 vivendas de promoción pública. A redacción do proxecto licitarase por un prezo de 148.241€.
O Goberno galego intentará duplicar nesta lexislatura o parque público residencial e acadar 4.000 novas vivendas. Neste momento, xa ten en marcha máis de 2.000 vivendas nas cidades de Vigo, Pontevedra, A Coruña, Santiago, Ourense, Lugo ou Ferrol.
A Xunta tamén ten en marcha a primeira fase da Estratexia Galega de Solo Residencial, coa que busca, en colaboración cos concellos, facilitar solo destinado á construción de 25.000 vivendas, 20.000 protexidas e 5.000 libres.
Na actualidade, a Xunta avanza na adxudicación da redacción dos Proxectos de Interese Autonómico (PIA) para desenvolver os primeiros ámbitos en sete concellos (Vigo, Pontevedra, A Coruña, Santiago, Arteixo, Lugo e Ourense) nos que se prevén máis de 15.000 vivendas.
