A Xunta e o Concello de Teo completaron as obras de renovación da rede de abastecemento na rúa Loureiro, actuación que beneficiará a máis de 200 familias dos Tilos, un dos principais núcleos do concello.
A conselleira de Medio Ambiente e Cambio Climático, Ángeles Vázquez, visitou a zona na que se executou a intervención acompañada polo director de Augas de Galicia, Roi Fernández, e pola alcaldesa de Teo, Lucía Calvo.
O financiamento foi cen por cen da Xunta de Galicia e alcanzou os 30.100 euros. Unha obra xestionada polo concello. Os traballos consistiron na substitución da rede antiga de abastecemento que recorre esta rúa e da que parten todas as acometidas que dan servizo aos edificios localizados ao longo da vía.
Tras lembrar que a veciñanza desta zona sufría cortes puntuais de auga por avarías bastante frecuentes na rede, coas conseguintes molestias e custos de reparación, a conselleira destacou que os traballos realizados en Teo permiten que as vivendas da rúa Loureiro teñan garantido o subministro.
A obra complementa as realizadas na rede de abastecemento das rúas Carballo e Buxo, tamén nos Tilos
Así mesmo, Ángeles Vázquez incidiu en que esta obra se enmarca nun convenio de colaboración subscrito en novembro do ano pasado entre a súa Consellería e o Goberno municipal, unha fórmula que, tal e como destacou, se utiliza habitualmente para apoiar ás entidades locais co financiamento de pequenas actuacións hidráulicas moi necesarias. A Conselleira lembrou que só o ano pasado Augas de Galicia subscribiu unha ducia de convenios similares ao de Teo para financiar outras tantas actuacións e cun investimento global por parte da Xunta de máis de 1,5 millóns de euros.
Este apoio ás administracións locais reflíctese tamén nos orzamentos de 2026, cun orzamento global de Augas de Galicia de 151,7 millóns de euros dos que 7 de cada 10 euros se destinarán a abastecemento e saneamento e case a metade, especificamente a investimentos para mellorar ou construír infraestruturas hidráulicas.
