Bisbarra, 10 de xuño do 2024 – A Xunta de Galicia reforza o equipamento do Grupo de Emerxencias Supramunicipal, GES, de Brión cunha achega valorada en máis de 200.000 euros.
O conselleiro de Presidencia, Xustiza e Deportes, Diego Calvo, participou nunha entrega de equipamento aos Grupos de Emerxencias Supramunicipais (GES) de brión e de Monterroso- Concellos que disporán desde agora cun camión Bomba Rural Pesada (BPR).
Ao acto de entrega asistiron os alcaldes de Brión, Pablo Lago Sanmartín, e Monterroso, Eloy Pérez; acompañados polo director xeral de Emerxencias e Interior, Santiago Villanueva; persoal responsable dos respectivos GES e os concelleiros brioneses Carlos Noya, José Antonio Vidal e María Fariña.
O alcalde de Brión, Pablo Lago, agradeceulle ao conselleiro a achega desta motobomba e lembrou que “para un concello pequeno como Brión é difícil manter un servizo como o GES, que actúa tamén noutros municipios que, quizais, deberían implicarse máis na súa financiación e mantemento”.
Neste sentido, agradeceu o exemplo ofrecido pola Xunta de Galicia, en xeral, e Diego Calvo en particular, no que atinxe ao cofinanciamento dos servizos, lembrando que “no 2022 recibimos un furgón para atención de emerxencias; o ano pasado conseguimos un novo e moderno equipo de excarceración; e este ano incrementamos a nosa dotación con esta Bomba Rural Pesada”.
Características do equipamento
Os camións destinados a ambos os dous grupos contan cunha capacidade de 3.000 litros e bomba centrífuga con presión combinada e lanzamento de auga en baixa e alta presión. Están especialmente deseñados para o seu uso en todo tipo de terreo, polo que todas as súas rodas son motrices e cun nivel mínimo de emisións de CO2.
O novo vehículo do GES ten capacidade para tres persoas, dispón dunha cisterna de auga de aceiro inoxidable e bomba centrífuga con presión combinada, é dicir, que permite lanzar auga en baixa presión, en alta presión ou simultaneamente en ambas as dúas.
Ademais, cada vehículo conta cun completo equipamento entre o que figuran un cargador de baterías, botiquín de primeiros auxilios, dous focos portátiles con imán e cargador, unha escaleira extensible, 5 lanzas profesionais de 25 e 45 mm, 16 tramos de mangueiras de 20 metros de lonxitude e distintos diámetros, dous extintores de 6 kg, un proporcionador de escuma e un ventilador portátil con batería, entre outros elementos.
