Porto do Son, 21 de xuño do 2022 – Portos de Galicia iniciou a licitación das obras de acondicionamento da lonxa de Portosín e dos edificios da futura lonxa e confraría de pescadores de Porto do Son.
A Conselleira do Mar, Rosa Quintana visitou este luns Portosín acompañada pola presidenta de Portos de Galicia, Susana Lenguas, e polo alcalde da Porto do Son, Luís Oujo. Quintana subliñou que o investimento conxunto supera os 400.000 euros co obxectivo de mellorar as condicións de traballo dos usuarios destas instalacións.
As confrarías de Portosín e Porto do Son agrupan máis de 150 embarcacións e 300 socios que serán os principais beneficiarios de estes investimentos. A Conselleira lembrou ademais que a estes hai que engadir os de outras localidades que venden aquí o produto e os traballadores das propias lonxas ou os comerciliazadores ao por maior ou polo miúdo que participan nas súas poxas.
Actuacións a desenvolver
Os traballos na lonxa de Portosín consistirán no acondicionamento do inmoble e na mellora da súa estanquidade. Renovarase a cuberta substituíndoa por outra de materiais máis modernos e resistentes. Tamén se cambiarán os canlóns e baixantes, realizarase o pintado e selado das fachadas e pintarase algunha zona interior do edificio, como a zona de oficinas. Todas estas actuacións contan cun orzamento de licitación de preto de 200.000 euros.
No caso de Porto do Son, acondicionarase e mellorarase a estanquidade da lonxa renovando a cuberta, os canlóns e as baixantes ao tempo que se procederá ao selado e pintado da fachada. No interior pintaranse ademais as zonas de oficinas, poxas e os aseos. No inmoble da confraría, selaranse as fachadas para evitar filtracións de auga e pintarase o interior. Estes traballos contan un orzamento de licitación de 230.000 euros.
Rosa Quintana explicou que a tramitación das dúas actuacións se atopa en fase de presentación de ofertas, un prazo que rematará a comezos de xullo. Posteriormente, unha vez contratadas e iniciadas as obras, o prazo de execución previsto é de catro meses.
