Bisbarra, 20 de novembro do 2023 – A Xunta mellorará nas vindeiras semanas o firme da estrada AC-260 que discorre polos concellos de Boqueixón e Santiago.
Trátase dunha obra adxudicada en máis de 43.000 euros que comezará en canto as condicións meteorolóxicas sexan favorables. Os traballos consisten na rehabilitación do firme da estrada AC-261 na contorna dos puntos quilométricos 2+000, en Aríns, no concello de Santiago de Compostela, e 8+000 en Lamas, no municipio de Boqueixón.
As intervencións consistirán no fresado e na reposición de 5 cm da capa de rodaxe do firme existente nos citados puntos quilométricos. A reposición da rodaxe levarase a cabo no ancho completo dos carrís cunha capa de mestura betuminosa en quente.
As obras, que contribuirán a reforzar a seguridade viaria na zona, danlle continuidade ás diversas actuacións de mellora do firme que a Xunta leva acometido nos últimos anos en diversos treitos do trazado desta vía.
