Bisbarra, 24 de setembro do 2024 – A Xunta de Galicia, segundo o presidente Alfonso Rueda, está disposta a redactar o proxecto da depuradora de Sisalde en Ames e o concello buscará o apoio económico do goberno central.
Alfonso Rueda e o alcalde de Ames, Blas García Piñeiro, mantiveron un encontro no que trataron este e outros temas de importancia para Ames.
A depuradora, incluída no Plan Hidrolóxico de Galicia Costa, ten un nivel de investimento de máis de 20 millóns de euros. Dez millóns de euros necesarios para a ampliación da EDAR, aos que habería que sumar outros dez millóns para mellorar a rede de colectores, máis outro millón para a realización do proxecto construtivo.
O concello destacou o seu compromiso de negociar co Goberno central para que esta actuación sexa de interese xeral e entre na financiación do Estado.
Durante o encontro, Rueda trasladou ao rexedor a vontade da Xunta de colaborar co concello en proxectos de interese común para todos os habitantes de Ames, ademais da planta depuradora. Comprometeu a participación do Goberno autonómico nun convenio a tres bandas para a construción do Mercado municipal, que precisa dunha financiación de 3 millóns de euros.
Tamén se deron avances no desenvolvemento do polígono industrial de Bertamiráns, xa que se vai analizar a viabilidade de empresas interesadas e haberá unha reunión coa conselleira de Economía e Industria, María Jesús Lorenzana, para analizar a situación.
Por último, Rueda e o alcalde de Ames acordaron en que se van urbanizar 5 parcelas para ceder ao IGVS e poder construír vivendas.
