Bisbarra, 16 de decembro do 2022 – O Consello da Xunta autorizou este xoves a colaboración co Concello de Brión para o acondicionamento dun treito da estrada AC-543.
O obxectivo do convenio, cuxas obras executará o Concello de Brión, é acondicionar a estrada AC-543, desde o punto quilométrico 8+390 ao 9+870. A Xunta procederá ademais ao cambio de titularidade a prol do Concello de Brión do tramo desta vía autonómica comprendido entre os quilómetros 8+390 e 10+000.
Esta intervención suporá un investimento de máis de 605.000 euros, que será financiado nun 70 % pola Xunta, a través da Consellería de Infraestruturas e Mobilidade, cunha achega que rolda os 424.000 euros, que completará o Concello ata acadar o 30 % restante.
As actuacións que se prevén realizar neste treito da estrada son a ampliación e a renovación das beirarrúas e o fresado e reposición da capa de rodaxe nos dous carrís, beiravías e bandas de estacionamento, con mestura bituminosa en quente.
Tamén se levará a cabo a renovación da sinalización horizontal, a reposición das liñas existentes e o pintado de paso de peóns, símbolos e frechas. Ademais, procederase á reposición dos servizos afectados, como o alumeado público, o saneamento e as canalizacións de pluviais.