A Baña, 9 de maio do 2022 – Unha axuda destinada a corrixir impactos paisaxísticos permitirá ao concello da Baña a mellora do centro da terceira idade e do lavadoiro de Cabanas.
A achega é concedida pola Consellería de Medio Ambiente, Territorio e Vivenda e divídese en dúas axudas de 20.000 euros. A primeira , irá destinada ao lavadoiro de Cabanas. Trátase dun elemento de formigón armado que na actualidade presenta manchas e humidades polo que se procederá á súa limpeza e á reparación de fendas antes de pintalo.
A segundas subvención, do mesmo importe, ten como finalidade a limpeza e reparación da fachada do centro sociocultural da terceira idade para o seu posterior pintado.
O Delegado da Xunta na Coruña, Gonzalo Trenor, reuniuse co alcalde, Andrés García Cardeso, para informarlle de esta axuda de 40.000 euros. No conxunto da comarca de Santiago, a Xunta concedeu axudas a 5 concellos: Santiso, Ordes, Boimorto, O Pino e A Baña, por un importe global de máis de 136.000 euros.
Loita contra o “feismo”
Este programa de incentivos foi convocado en xaneiro por 600.000 euros e esta mesma semana foi ampliado ata os 800.000 €. Son dúas liñas de actuación das que a primeira destínase a intervencións coas que emendar o impacto negativo que poden causar sobre a contorna edificios e dependencias que acollen servizos municipais.
A segunda liña de axudas está pensada para mellorar outros equipamentos públicos ou elementos etnográficos, como fontes, hórreos, palcos de música e lavadoiros, propiedade dos concellos.
As actuacións subvencionables, que poderán acadar o 70% do custo estimado, deberán adaptarse ou ben aos criterios fixados na Guía de cor e materiais de Galicia, ou ben aos da Guía de boas prácticas de caracterización e integración paisaxística de valados.
O ano pasado a primeira convocatoria das ordes de axudas para a corrección de impactos paisaxísticos, tanto para particulares como para concellos, saldouse con máis de medio milleiro beneficiarios que recibiron subvencións por un importe total de 2 millóns de euros e permitiron intervir en 222 municipios galegos.