Teo, 6 de marzo do 2019 – O mestre e escritor Xosé María Lema, veciño de Cacheiras, fixo entrega do seu fondo fotográfico ao concello de Teo.
A intención de Xosé María Lema é que o o Concello o custodie e poida poñelo a disposición de investigadores ademais de poder utilizalo para actividades culturais municipais coma exposicións, charlas ou actividades divulgativas.
Trátase de case 200 imaxes de todo o municipio realizadas ao longo dos últimos 30 anos. O acto de doazón asinouse na Casa do Concello coa presenza de propio Lema, do alcalde, Rafael Sisto, a concelleira de Cultura, Pilar Faxil, o arquiveiro municipal, Pablo Sanmartín e a secretaria accidental, Sandra García.
A doazón está composta por un estoxo con 184 diapositivas con imaxes dos diferentes bens culturais das diferentes parroquias realizadas entre os anos 1988 e 2003. Algúns das imaxes recollen elementos que na actualidade teñen mudado o seu aspecto ou xa non existen polo que este testemuño gráfico ten máis importancia. Deste xeito este grupo de imaxes pasan a formar parte da colección fotográfica histórica do arquivo municipal. O Concello comprométese a dixitalizalas ademais de garantir a súa conservación e difusión ademais de facilitalas para o coñecemento da veciñanza e dos/as investigadores/as.
