Compostela, 18 de abril do 2019 – O concello de Santiago e a Asociación de Hostalería de Compostela presentaron as actividades gastronómicas vinculadas ao Banquete de Conxo.
A Nave 5 da Praza de Abastos acolleu a primeira xornada gastronómica de degustación de cabra das tres que se van celebrar ao abeiro da Festa do Banquete. A iniciativa foi presentada polo alcalde, Martiño Noriega; a concelleira de Igualdade, Desenvolvemento Económico e Turismo, Marta Lois, e a presidenta da Asociación, Sara Santos.
A listaxe de restaurantes participantes son a Pulpería Fuentes, Paz Nogueira, Los Caracoles, O Muiñeiro, A Nave de Vidán, Don Quijote, Pazo de Altamira, Sexto II, María Castaña, Mesón de Lázaro, San Jaime, Pampín, Caney, Amoado, A Ostrería e Frebas. Estes restaurantes, que se atopan por todo Santiago, prepararán pratos ou tapas especiais con cabra os días 2, 3, 4 e 5 de maio.
O obxectivo desta acción, que se leva a cabo por segundo ano, é poñer en valor este produto, que se degustou aquel 2 de marzo de 1856 e forma parte da gastronomía dos barrios do sur de Compostela. A iniciativa complétase con varias xornadas gastronómicas de degustación de cabra. A seguinte será na Bodeguilla de Santa Marta o venres 26 de abril pola tarde, e a última terá lugar o venres 3 de maio ao mediodía no mercado La Galiciana.
Por outro lado, a sede da Asociación de Hostalería acollerá a segunda edición do curso de ‘Elaboración de receitas de cabra’, que xa se celebrara o ano pasado. O curso será impartido desta vez polo profesor David Rodríguez Cebeiro e terá lugar os días 24, 25, 26, 29 e 30 de abril. Ademais a Asociación Hostalería Compostela organiza un xantar popular o domingo 5 na carballeira de Conxo. En total, espéranse repartir máis de 800 degustacións de diferentes elaboracións de cabra como produto tradicional e diferenciado non só de Conxo senón de diferentes barrios da cidade. Neste xantar, ademais de cabra tamén se servirá outras elaboracións como polbo, churrasco, empanadas, polo… e tamén estarán dispoñibles diferentes tipos de bebidas.
A Festa do Banquete
A carballeira de Conxo acollerá, por segundo ano, a Festa do Banquete cunha chea de actividades que se celebrarán os días 3, 4 e 5 de maio. A concelleira de Igualdade, Promoción Económica e Turismo, Marta Lois explica que “a Festa do Banquete celebrouse de novo o ano pasado, máis de 150 anos despois daquel 2 de marzo de 1856, cunha gran festa á que asistiron miles de composteláns e compostelás, aproveitando a recuperación ambiental do espazo que, dende aquela, pode gozar a veciñanza durante todo o ano”.
A Festa do Banquete contará con varias novidades en esta edición. Por unha banda, amplíase ao venres, xornada que servirá para que a cativanza goce de diversas actividades. Por outra banda, nesta edición implicouse tamén aos barrios de Santa Marta, Pontepedriña, A Rocha e O Castiñeiriño, por petición popular, por ser zonas pertencentes ao antigo concello de Conxo.
Ademais, co gallo de preparar as actividades que formarán parte da mesma, levaranse a cabo distintas accións durante as semanas previas. As persoas que o desexen poden sumarse como actor ou actriz ás distintas accións teatrais, ben ao roteiro histórico-teatral do sábado 13 de abril ou ao desfile teatral de estudantes e artesáns do domingo 5 de maio. Tamén poden participar ou na organización da Festa do Banquete ou ben como persoa voluntaria co grupo que está a crear a Asociación Itinera. Para calquera desas opcións habería que contactar co Centro Cívico de Conxo, no correo csconxo@santiagodecompostela.gal ou ben no teléfono 981 528 740.
Historia
O Banquete de Conxo foi un dos principais fitos da historia contemporánea de Galicia. O 2 de marzo de 1856, un grupo de estudantes universitarios, entre os que estaban Eduardo Pondal, Aurelio Aguirre, Luís Rodríguez Seoane e Manuel Murguía, mesmo especúlase que tamén tivese asistido Rosalía, convidaron a obreiros e artesáns de Compostela a un xantar baixo o abrigo da carballeira de Conxo. A comida foi servida polos propios estudantes vestidos de frac, nun xesto de gran simbolismo. Durante o banquete fixéronse brindes nos que se leron proclamas progresistas e demócratas consideradas como subversivas polos poderes dominantes da época.
Este acto de fraternidade celebrouse dez anos despois da falida revolución de Carral e os seus promotores foron ameazados co desterro.
