Vedra, 20/03/2026 – A Cidade da Cultura acolleu a presentación da XLIV Festa do Viño da Ulla, que se celebrará en Vedra no mes de abril. O alcalde de Vedra, Carlos Martínez Carrillo e a deputada provincial de Mar e Medio Rural, Cristina Capelán, foron os encargados de explicar as novidades da festa.
Durante a súa intervención, Cristina Capelán destacou o papel da Deputación da Coruña no apoio a iniciativas que poñen en valor o rural galego, subliñando que “Galicia é terra de produto, de colleita e de tradición, e por iso resulta fundamental continuar impulsando e dando visibilidade a esta riqueza que nos define como pobo”.
A Festa do Viño da Ulla, que conta cunha longa traxectoria dende a súa creación en 1980, representa, en palabras da deputada, “un claro exemplo da importancia de preservar as tradicións e de apoiar o produto local e a cultura vitivinícola da zona”.
Neste sentido, incidiu tamén na necesidade de que as distintas institucións colaboren de maneira coordinada, sumando esforzos para fortalecer este tipo de eventos, que contribúen de forma significativa ao desenvolvemento económico e social do territorio.
A Deputación da Coruña é unha das principais entidades colaboradoras desta tradicional cita, que se celebrará o 11 e 12 de abril en San Miguel de Sarandón (Vedra).
