Compostela, 16 de febreiro do 2022 – A Sala Capitol acollerá o vindeiro domingo 20 de febreiro o concerto de presentación de Peixe de Xisco Feijoó.
O cantante e bailador Xisco Feijoó, co que falabamos no pasado mes de agosto, acompañarase na cita de figuras convidadas entre as que están as Tanxugueiras. Xisco foi o protagonista do vídeo Midas das cantareiras e pandereteiras e agora elas participan no seu concerto.
As entradas para o concerto, que comezará ás 20.15 horas, están dispoñibles a través do propio espazo web do artista xiscofeijoo.gal .
Xisco e Peixe
O pasado 3 de febreiro Peixe, o sinxelo de presentación do novo e proxecto do cantante e bailador Xisco Feijoó, cumpriu o seu primeiro aniversario.
O tema, avance do álbum homónimo, acompañouse á súa vez dun simpático e coral videoclip, que supuxo un chamado á diversidade. Nese intre, Peixe abriu unha ventá a novas miradas contemporáneas sobre a tradición; froito da reinterpretación de temas populares desde a modernidade e o atrevemento.
Un ano despois do lanzamento de Peixe, a Sala Capitol acollerá o concerto de celebración desta nova etapa creativa do artista coa intención de vivir unha gran festa da exaltación da tradición e da diversidade. Esta é, ao cabo, a propia esencia do álbum Peixe, publicado o pasado mes de xullo.
O disco, no que conflúen a raíz e as sonoridades modernas á vez que a voz toma o protagonismo absoluto sobre os demais instrumentos, pon en valor o papel da cantiga tradicional, da que o bailador salienta a súa identidade e significado propio.
En Santiago de Compostela Xisco Feijoó acompañarase da meirande parte da familia de Peixe, un grupo interdisciplinar de artistas que participou na gravación do disco: Artur Puga e Xan Pérez
(voces, percusións e baile), Iago Ramilo (saxofóns), Jose Manuel Díaa (contrabaixo), Mariño Malleiro (clarinete e acordeón) e Miguel Fraile (guitarra).
Sobre as táboas tamén estarán dous compañeiros da ETRAD, produtores e arranxistas do disco: Carlos Quintá (teclados) e Xosé Liz (cordas). Nos vindeiros días o bailador dará a coñecer novas colaboracións a través das súas redes sociais.
