Teo, 21/03/2026 – Desde hai anos calquera instalación vinculada á reciclaxe ou xestión de certo tipo de residuos levanta sospeitas na poboación. O sucedido en distintos lugares xeran preocupación e a posible instalación xestora de residuos de construción en Teo pasa polo mesmo proceso.
O Concello de Teo ven de emitir un comunicado no que “quere deixar claro que non ten nin tivo potestade algunha para autorizar ou non a Xestora de Residuos inertes da Construción que se ubicará no lugar da Torre, parroquia de Cacheiras”.
O goberno municipal lembra que se trata dunha competencia autonómica na que “o Goberno local non pode emitir ningún tipo de informe vinculante”. O goberno reuniuse coa veciñanza do lugar á que lle trasladou que “a empresa conta con autorización ambiental da Administración autonómica, non polo Concello”.
Na reunión estivo presente a alcaldesa, Lucía Calvo de la Uz, e o arquitecto municipal, que informaron do proceso e da situación actual, “quedando resoltas todas as dúbidas dos veciños”.
A planta que se pretende implantar en solo rústico ten un uso permitido conforme á Lei Galega do Solo, que no seu artigo 35 “usos e actividades en solo rústico”, apartado “m”, estipula que se permitirán as instalacións e infraestruturas públicas ou privadas para a xestión e tratamento de residuos inertes en solo rústico.
Conforme á lexislación ambiental, o ente autonómico só lle pediu ao Concello un informe de viabilidade urbanística da parcela, o cal nin tan sequera foi emitido. En estes casos non é necesaria a autorización municipal para a aprobación da tramitación medioambiental de dita actividade, xa que a lei di expresamente que deberá ser favorable en calquera caso.
Nesa xuntanza tamén se lles recordou que toda a tramitación desta planta estivo sometida a exposición pública, tanto na web oficial da Xunta de Galicia como nos medios de comunicación de máxima tirada, podendo exercer o dereito de alegación e de consulta por calquera veciño ou asociación.
Estase a falar dunha empresa que pechará o ciclo de vida útil dos materiais da construción, co obxectivo de reducir as emisións de CO2 e residuos contaminantes. Esa empresa, que leva desenvolvendo actividades industriais nesa mesma parcela desde fai máis de 20 anos, traballará con materiais inertes, tales como pedra, ladrillo, xeso ou ferro, converténdose nunha especie de punto limpo para ese tipo de materiais. En calquera caso, non haberá nin lodos nin ningún tipo de residuos orgánicos.
