Compostela, 21 de decembro do 2021 – Xabier Díaz leva desde o 2016 ofrecendo un concerto de Nadal na sala Capitol de Compostela.
As entradas para ese concerto agotáronse xa polo que Xabier Díaz e Adufeiras do Salitre ofrecerán dous pases, sendo o primeiro as cinco da tarde e o segundo, xa vendido, as oito e media.
A cita co concerto de Nadal será o vindeiro 26 de decembro. O proxecto do músico coruñés ofrece ao público compostelán un concerto que, dalgún xeito, quere ser unha festa de celebración para despedir o ano e, no caso da banda, despedir tamén a xira de concertos do verán.
Presentarán o seu último traballo As Catedrais Silenciadas, terceiro álbum coas Adufeiras de Salitre e, quizais, a obra que mellor explora os límites dun formato que xa percorreu máis de 13 países con máis de 200 concertos.
As Catedrais Silenciadas son un berro de alerta ante o progresivo despoboamento do rural e a perda identitaria que isto implica. Un chamamento ante a desaparición da cultura propia que nos diferencia do resto do mundo. As Catedrais Silenciadas son, en palabras de Xabier Díaz, ‘’os vellos soutos milenarios, o idioma, os alalás, os nomes dos cons, as vacas ou as vellas ribeiranas. Cómpre restauralas e empregalas para que medren vizosas e prendan no peito de quen non as coñece.’’
A cita do 26 de decembro contará coa colaboración das pandeireteiras do Morrazo Lina e Lola, encargadas de abrir un concerto en que, como vén sendo habitual, Xabier Díaz e As Adufeiras de Salitre queren poñer o ramo ao 2021 con música, percusión, festa e moito baile.
