Bisbarra, 30 de decembro do 2022 – Compostela acolleu a presentación de “O Gran Camiño” a volta ciclista que percorrerá Galicia rematando en Ames e Compostela.
“O Gran Camiño” disputarase do 23 ao 26 de febreiro. Serán catro etapas, unha por provincia. Está confirmada a participación do Team Movistar e do Jumbo Visma co vixente campión do Tour, Jonas Vingegaard.
Esta proba recupera a tradición da antiga Volta a Galicia. Será a segunda edición en este formato cunha especial dedicación ao patrimonio. Sairá da Muralla Romana de Lugo e chegará a Praza do Obradoiro, dous lugares Patrimonio da Humanidade.
A última etapa terá unha especial relevancia na bisbarra xa que sairá do Polígono Novo Milladoiro en Ames. Será unha etapa contrarreloxo que tras pasar por distintas estradas da contorna chegará a Compostela.
O responsable da proba, o teense e ex ciclista Ezequiel Mosquera, dixo de Compostela que “Esta é case a cidade que lle dá sentido a todo” e cualificou a última etapa como “moi especial” por ter o final na praza do Obradoiro.
O exciclista galego Óscar Pereiro, padriño da proba, eloxiou o éxito da primeira edición do Gran Camiño e augurou que se superará este, mentres que destacou a capacidade do ciclismo para “difundir unha terra que ‘es la leche'”, en referencia a Galicia.
Pola súa banda o presidente da Deputación da Coruña, Valentín González Formoso, confirmou durante a presentación da etapa o apoio da institución provincial a esta rolda e ao recoñecemento da Coruña e de Galicia como “territorio ciclista. É unha proba que soa moito e está aquí para quedar”.
Finalmente, o alcalde de Santiago, Xosé Sánchez Bugallo, sinalou que esta volta transmitirá a todo o mundo “unha imaxe fantástica e preciosa do noso país” nun ano que, ademais, xa non será Ano Santo, co que se incrementa a importancia de difundir os recunchos galegos.
