Este luns, 16 de febreiro, inaugurase a exposición de fotografía Virando o Rosa. A autora Diana Fajardo presenta unha iniciativa que pivota sobre tres eixos: un libro gráfico, relatorios nas presentacións públicas e unha exposición fotográfica.
Con estos obxectivos converxentes búscase tratar esta realidade social, amosala e intentar mudar comportamentos sanitarios na abordaxe do cancro e na atención ás mulleres; axudar a xerar un debate público para conseguir cambios no tratamento ás afectadas, ao mesmo tempo que dar un espazo ás mulleres que se atoparon con este tipo de comportamentos para poder presentar as súas propias experiencias.
Diana Fajardo recibiu o VII Premio Luisa Villalba a proxectos pola igualdade da Deputación da Coruña. A exposición enmárcase dentro das celebracións da USC polo 8M. Na inauguración estarán presentes algunhas das mulleres protagonistas das fotografías expostas.
A exposición busca superar imaxes como o lazo ou o pano rosa que, baixo un discurso de empoderamento e visibilización da recuperación, ocultan outras realidades.
Preténdese dar voz e visibilidade ás experiencias e imaxes das mulleres diagnosticadas con cancro nun momento en que si existe unha presencia mediática das doentes, pero o discurso predominante é case exclusivamente o de recuperación por riba das eivas que tamén se deberían amosar.
Achegámonos a unha realidade pouco tratada, pero que moitas afectadas consideran imprescindible sacar á luz para cambiar comportamentos, ofrecer unha atención máis personalizada, respectar os desexos das pacientes e buscar novas solucións aos problemas derivados dunha diagnose que segue tendo unha alta mortalidade e que marca un antes e un despois na vida das mulleres dende a súa detección.
Tamén superar a imaxe de guerreras, loitadoras e valentes que se expande como tantra e autoimpón respostas de superación en todo momento, sen ter en conta un día a día nos que falta axuda, recursos e rede de protección.
A mostra pode visitarse ata o 4 de marzo en horario de luns a venres, de 11.00 a 14.00 e de 17.00 a 20.30 horas.
Diana Fajardo
Diana Fajardo é unha fotógrafa documental con máis de 20 anos de experiencia, 12 deles co seu proxecto persoal. Algúns dos seus traballos máis reseñables pódense contemplar de xeito permanente na Domus da Coruña.
Con exposicións individuais e colectivas, leva 10 anos como docente cunha escola de fotografía propia, onde aborda a formación dende unha perspectiva feminista.
