O BNG de Vila de Cruces denuncia os continuos vertidos no río Deza e pide medidas urxentes ás administracións. Os nacionalistas piden colaboración aos concellos da contorna.
O Bloque Nacionalista Galego de Vila de Cruces ven de expresar a súa preocupación polos vertidos detectados no río Deza, visibles en diferentes puntos do municipio e especialmente preocupantes pola súa repetición ano tras ano.
A aparición de escuma e restos contaminantes supón un risco para o ecosistema e para o aproveitamento social e económico do río. Segundo sinala Alejandro Fiuza, portavoz do BNG de Vila de Cruces “É inaceptable que, cada ano, asistamos a episodios de vertidos sen que se adopten medidas contundentes. A saúde do río Deza e o benestar da nosa veciñanza están en xogo.”
A formación lembra que a situación repítese constantemente, sen que as administracións con competencias ambientais (Xunta, Confederación Hidrográfica e Concellos) poñan en marcha actuacións que atallen a orixe do problema.
Segundo Fiuza “Non chega con abrir expedientes: é necesario un plan integral de control e saneamento que inclúa inspeccións periódicas, sancións a quen contamina e investimentos en depuración”.
O BNG reclama ademais que o Concello actualice de inmediato a sinalización da calidade da auga na área da Carixa, para evitar mensaxes enganosas á veciñanza e visitantes. Que os restantes concellos polos que discorre o Deza e os seus afluentes adopten medidas semellantes e investiguen posibles focos de contaminación, especialmente ante as sospeitas de que os vertidos poidan proceder dunha EDAR que non funciona correctamente.
A formación nacionalista comprométese a levar esta problemática aos plenos municipais, ao Parlamento Galego e ao resto de órganos supramunicipais correspondentes, co obxectivo de que o Deza recupere a súa saúde ecolóxica e continúe a ser fonte de vida e riqueza para o territorio.
