Bisbarra, 12 de setembro do 2022 – O BNG de Vila de Cruces demanda unha reunión coa Consellería de Educación para denunciar o estado no que se atopan as infraestruturas educativas do concello.
O voceiro nacionalista en Vila de Cruces, Alejandro Fiuza, explica que “Os centros educativos sofren o abandono do goberno local e tamén da Xunta. Ignóranse problemáticas históricas demandadas polas familias usuarias durante décadas, e que cada ano os nacionalistas presentan en forma de enmendas aos orzamentos da Xunta”.
O BNG explica que tras o peche do CEIP de Merza, Vila de Cruces conta cun centro rural, o CEIP Cerdeiriñas de Piloño, “con parte das instalacións deterioradas debido ao abandono de Xunta e Concello”.
Engaden que sucede o mesmo co CEIP Nosa Señora da Piedade “No que o goberno local deixa escapar oportunidades de financiamento como a subvención das pistas multideportivas, por falta de previsión e preocupación”.
Dende o BNG piden ao alcalde de Vila de Cruces, Luís Taboada, que solicite, de xeito urxente, á Consellaría de Educación unha reunión coa representación de todos os grupos da corporación.
Os nacionalistas expoñen problemas como as instalacións do Pavillón do CEIP Cerdeiriñas, a instalación das tubarias, o cambio das ventas con amianto, o acceso á pista deportiva… así como melloras para o acceso aos centros, xa que a distancia que o alumnado ten que percorrer é o suficientemente longa para coller boas molladuras durante o inverno.
Á súa vez, o BNG reclama explicacións ao grupo de goberno pola nula xestión no peche do CEIP de Merza. Polo que o grupo do BNG demanda a negociación coa Xunta para a concesión das instalacións, co fin de darlle unha segunda oportunidade ao centro, consensuada coa veciñanza e asociacións.
Fiuza di que “O BNG defende un rural vivo, con colexios adaptados ás necesidades do século XXI, e edificios públicos útiles para a veciñanza”.
