Vila de Cruces, 1 de xunho do 2022 – O BNG de Vila de Cruces denuncia os constantes problemas do servizo da barcaza de Portodemouros e pide a Xunta e empresa concesionaria responsabilidade.
A barcaza estivo parada entre o 25 e 27 pasados cunha nova avaria. O acceso dun tractor provocou a rotura dunha botella hidráulica polo exceso de peso. Que o ferri non cumpre coas condicións necesarias para o servizo é unha das denuncias recorrentes da veciñanza.
Os nacionalistas engaden que unha avaría non pode deixar sen servizo aos usuarios durante dous días. Piden que o servizo técnico dobre as quendas en estes casos para poder solucionar os problemas no menor tempo posible.
O deputado do BNG Xosé Luis Rivas Cruz realizou unha serie de preguntas á Consellería de Infraestruturas sobre as melloras e mantemento do servizo. Tras recibir a resposta explica que, ao seu xuizo, non se está a facer seguimento do traballo da empresa ou si se está a facer “a Xunta mira para outro lado”.
O parlamentario explica que as rampas de acceso non compren coas medidas necesarias nin de ancho nin de longo. Tampouco é suficiente a iluminación colocada pola empresa do lado do concello de Santiso, xa que na marxe de Vila de Cruces o acceso de embarque segue a día de hoxe totalmente a escuras.
Dende o BNG esixen responsabilidade ante a perigosidade do acceso á barcaza. Demandan ademais que a Xunta se asegure de manter o servizo as 24 horas dos 365 días do ano, tal como establece o acordo.
O voceiro nacionalista en Vila de Cruces, Alex Fiuza, pide responsabilidade ao alcalde Luis Taboada, que” ten totalmente esquecida á veciñanza de Loño e Arnego con este asunto, a única resposta que reciben del é que hai que facer unha manifestación, polo que dende o BNG pedimos ao alcalde que actúe en consecuencia ao cargo que ocupa, e faga caso das demandas”.
