O Concello de Noia celebra este domingo 14 de decembro a VIII Edición das Xornadas de Exaltación do Berberecho, cunha gran festa degustación popular na Alameda, que dará comezo ás 13.00 horas.
O evento, aberto a toda a veciñanza e visitantes, terá un donativo de 5 euros, que será destinado integramente a Cáritas e Cruz Vermella. A degustación incluirá unha coidada selección de elaboracións tradicionais: empanadas de trigo, empanadas de millo e arroz con berberechos, poñendo en valor un dos recursos marisqueiros máis emblemáticos da ría de Muros-Noia.
Esta celebración estaba prevista inicialmente para novembro, pero tivo que ser adiada por mor da presenza de toxina, polo que agora se retoma unha vez garantidas todas as condicións sanitarias para o consumo do produto.
O Concelleiro do Mar, Manolo Seijas, destacou que “esta festa é unha homenaxe ao traballo do sector marisqueiro e unha oportunidade para que a xente coñeza e deguste un produto de máxima calidade como é o berberecho de Noia, ademais cun claro compoñente solidario”.
Pola súa banda, o Secretario da Confraría de Pescadores San Bartolomeu de Noia, Adelo Freire, lembrou que “estas xornadas son froito do esforzo conxunto do sector, das institucións e da veciñanza, e serven para reivindicar o valor económico, social e cultural do mar en Noia”.
Freire engadiu que “o berberecho é identidade, tradición e sustento para moitas familias, e iniciativas coma esta axudan a visibilizar ese labor”.
Desde a organización anímase á participación masiva neste evento festivo e solidario, que combina gastronomía, tradición mariñeira e compromiso social, convertendo a Noia, unha vez máis, en referente da exaltación do seu produto estrela.
