Compostela, 18 de agosto do 2021 – A Universidade de Santiago convoca o VII certame de fotografía Ruth Matilda Anderson co foco posto no no derrubamento dos estereotipos de xénero.
Ata o vindeiro 10 de setembro, a comunidade universitaria da USC, así como antigos alumnos e alumnas, poderán participar na sétima edición do Ruth Matilda Anderson. O concurso ten como obxectivo premiar a creatividade, a innovación e o impacto da imaxe.
A temática de este ano é sacar á luz o labor historicamente invisibilizado que desenvolven as mulleres na sociedade. Búscase deconstruír os estereotipos de xénero no relativo a traballos supostamente propios de mulleres ou homes. Ista é a meta do certame de fotografía Ruth Matilda Anderson que neste 2021 chega á súa sétima edición.
“Coa elección de Ruth Matilda Anderson para dar nome a este certame, lémbrase a unha muller que fixo un traballo importante nun campo tradicionalmente desenvolvido por homes, e a súa destacable obra, na que se inclúe o retrato que Ruth Matilda fixo da muller galega dos anos 20”, explican dende a Oficina de Igualdade de Xénero da USC. O certame está dirixido a alumnado antigo e actual da USC, así como a todo o persoal da institución compostelá.
O formato das imaxes presentadas deberá ser dixital, cunha resolución mínima de 300 ppp, orientación horizontal, e tamaño A3 ou A4. O xurado seleccionará as doce fotografías de maior calidade técnico-artística sempre que se axusten á temática establecida na convocatoria. De entre estas, o xurado escollerá as tres mellores.
O primeiro premio conta cunha dotación económica de 1.000 euros, alén de que esta fotografía sexa a utilizada pola USC, como cartel conmemorativo do Día Internacional das Mulleres no ano 2022. A persoa recoñecida co segundo premio recibirá 800 euros, e a que recolla o terceiro, gañará 500 euros. Ao importe de cada un destes premios aplicaráselle as retencións previstas na vixente lexislación tributaria. Se o xurado o estimase conveniente poderá deixar algún ou todos os premios desertos. Coas doce fotografías finalistas elaborarase un calendario.
