Ames, 11 de xuño do 2021 – O Campo da festa de Biduído en Ames acollerá o vindeiro venres día 18 o SolporSon 2021 desde as nove e media da noite.
Verto, SonDaRúa e o grupo local Triska serán os protagonistas de este festival. SolporSon é unha iniciativa da Concellaría de Mocidade e Normalización Lingüística. Os convites pódense reservar desde este xoves, as entradas son limitadas por aforo reducido, na web woutick.es.
Tras a cancelación do festival en 2020 por mor da pandemia, este ano retómase no campo da festa de Biduído. O lugar foi elixido por estar a carón da Factoría, o local onde ensaia un dos grupos que forman parte do cartel: Triska. O recinto estará pechado e o evento cumprirá todas as medidas de prevención da COVID.
As “portas” abriranse ás 20.30h. As persoas que adquiriran o seu convite e non se presenten ao concerto antes das 21.30h perderán o dereito de entrada, e poderán adquirila no momento as persoas que ata alí se acheguen.
Triska será o primeiro grupo que subirá ao escenario. 3 mozos de Ames con influencias da música dos 70 e 90, cun estilo propio que mestura rock, funky e incluso heavy.
SonDaRúa é un grupo de rap galego formado en Ponteareas en 2016, unha das bandas con maior proxección do panorama galego dos últimos anos a través de hip hop reivindicativo, de crítica social e política.
Pecha o cartel Verto, un grupo independente de música pop, disco e trap galego que comezou en 2019. Está composto por Alberto Mira “Berto” e Fernando Peleteiro “Fer”. Considerados un dos grupos máis influentes na creación de música pop en galego.
A concelleira de Mocidade e Normalización Lingüística, Escarlata Pampín, explicou que “na procura de novas iniciativas para a mocidade naceu o SolporSon de Ames no 2019; un festival, organizado dende o departamento de mocidade, que xurde das xuntanzas que se mantiveron cos mozos e mozas no marco da Comisión de orzamentos participativos”.
