O concello organiza a Mostra de Arquitectura Rural, MARCO, que ten como obxectivo achegar a arquitectura á xente e romper barreiras coa veciñanza.
A arquitectura acostuma a estar lonxe da veciñanza, moitas veces é incomprendida pero sen ela non se constrúen nin as casas nin as vilas. Vedra quere mudar esta separación organizando a Mostra de Arquitectura Rural, MARCO, o vindeiro mes de maio.
O obxectivo principal de MARCO é romper coa barreira que distancia a Arquitectura dos seus beneficiari@s, e trasladar a importancia desta no desenvolvemento social, recuperando a confianza na disciplina como axente configurador de cidades e pobos e da calidade de vida das persoas.
MARCO engloba as artes sobre as que a arquitectura exerce de unión. Artes e arquitectura xogan un papel de relevancia na transmisión dos valores culturais, históricos e sociais de cada comunidade. O fin é poñer en valor as características propias da paisaxe, da arquitectura local e das dinámicas socio-culturais das aldeas.
A proposta trata de revalorizar a conservación do patrimonio construído e etnográfico, un desenvolvemento sostible e orgánico e a participación veciñal. Con esta intención MARCO tera unha programación con exposicións, actuacións, obradoiros e conversas.
Todas estas actividades arredor da arquitectura, escultura, pintura, danza, música, literatura, cine, fotografía, e a ilustración. Exporá exemplos de arquitectura a través de visitas a vivendas de Vedra na sección “O mellor de cada CASA” e mostrará construcións de aldea nos “Co.Bertos”.
Un proxecto organizado por ELO arquitectura e o concello de Vedra, e que conta co patrocinio do Colexio Oficial de Arquitectos de Galicia. Podes consultar a programación completa e inscribirte nas diferentes actividades no seguinte enlace https://tinyurl.com/2yg5vs68 .
