Bisbarra, 3 de febreiro do 2023 – O concello de Vedra inicia esta fin de semana as actividades vinculadas á camelia e faino coa sétima edición do Maratón de Montaña que organiza o club Vértice.
Vértice propón sábado e domingo catro probas distintas entre as que destaca o VII Maratón de Montaña “A Camelia”. O sábado disputarase unha subida ao Pico Sacro cun percorrido de algo máis de tres quilómetros e coa dificultade engadida da pendente a superar.
O domingo celebrarase unha andaina e un trail. Serán 14 quilómetros de percorrido coa novidade de incorporar o “pequetrail” con tres categorías e percorridos diferentes en canto a dificultade e segundo a idade.
A proba estrela da fin de semana será o Maratón de Montaña da Camelia con 43 quilómetros de percorrido. Unha proba na que a organización leva traballando meses e na que están inscritas máis de 400 persoas.
Esta fin de semana deportiva serve de inicio a dous meses nos que a camelia será a protagonista en Vedra. Unha programación que inclúe actividades de tipo turístico, deportivo e cultural. Obradoiros, excursións, visitas teatralizadas ou espectáculos musicais enchen este ano o calendario que se pode consultar xa na web do concello. Un espazo no que consultar, prazos e fórmulas de inscrición.
