A exaltación do viño da Ulla volverá a San Miguel de Sarandón, en Vedra, os vindeiros 5 e 6 de abril mantendo na cuadraxésima terceira edición as catas, as rutas e a festa.
A Cidade da Cultura acolleu un ano máis a presentación da XLIII Exaltación do Viño da Ulla. Coa presenza da comisión organizadora, bodegueiros, convidados e medios de comunicación, deuse a coñecer, este pasado venres, o programa de actividades para a festa do viño da Ulla.
A festa terá como todos os anos un compoñente profesional uns días antes, cando se celebren do 2 ao 4 de abril as xornadas técnicas sobre a cultura do viño. Terán lugar na Casa da Cultura de San Miguel de Sarandón e tratarán temas como a fertilización, a posibilidade de harmonizar os viños e as tapas e contarán tamén cunha visita guiada a unha bodega.
A parte máis lúdica queda para os propios días 5 e 6 de abril. As rutas mototurísticas e de coches antigos son xa unha parte fundamental na festa e percorreran os viñedos da contorna incluíndo unha visita a unha bodega, As motos o sábado 5 e os coches o domingo 6.
A cata concurso que decidirá os mellores viños do ano celebrarase no Pazo de Vistalegre, será a sétima edición. O sábado abrirase ás seis da tarde a mostra dos concellos da subzona ribeira do Ulla e ao mesmo tempo a mostra dos viño D.O. Rías Baixas sibeira do Ulla. Estas mostras serán o verdadeiro comezo da festa que continuará coa música de distintas agrupacións folclóricas desde as sete da tarde.
A festa do sábado rematará co concerto de Os John Deeres e The Rapants, e a animación ata a madrugada da Disco Movil Chocolate.
O domingo o pregón correrá a cargo da Conselleira de Medio rural, María José Gómez. A continuación nomearanse os novos membros da Orde dos amig@s do Viño da Ulla. Este acto finalizará coa entrega dos premios da VII Cata Concurso.
A XLIII Exaltación do Viño da Ulla rematará con músico ao longo de todo o dia e o espectáculo da Orquestra París de Noia desde as sete da tarde. A festa conta este ano co apoio de moitos dos empresarios da contorna, da Deputación da Coruña, Galicia Calidade, a Xunta de Galicia e o concello de Vedra.
