Bisbarra, 28 de marzo do 2023 – O concello de Vedra ven de presentar a XLI Festa do Viño da Ulla, unha das máis lonxevas da bisbarra de Compostela que chega con importantes novidades.
O edificio Fontán, na Cidade da Cultura de Galicia, foi o lugar elixido para a presentación da cuadraxésimo edición da exaltación dos viños da ribeira do Ulla. Xunto ao alcalde de Vedra, Carlos Martínez Carrillo, participaron na presentación Jose Garcia, membro da comisión de festas; Marieli Mogo, secretaria; Rubén González, presidente e Iván García vocal.
Ademais das actividades de esa fin de semana a Festa leva aparelladas as Xornadas Técnicas sobre a Cultura do Viño que se celebraran do 12 ao 14 de abril. Comezarán cunha conferencia do experto Juan Carlos Vázquez Abal sobre “A boa práctica fitosanitaria e de biocontrol nos viñedos”. Un túnel do viño, no que probar os caldos das distintas adegas, e unha saída de campo na que coñecer os novos proxectos vitivinícolas completan o programa das xornadas.
Esta edición da Festa do Viño da Ulla terá dous itinerarios moi especiais. O sábado 15 unha ruta moto turística e o domingo unha de coches antigos. En ambos os dous casos visitarase unha adega e haberá unha cata degustación. As inscricións son gratuítas aínda que as prazas son limitadas.
A Festa terá ademais actividades de éxito, xa recoñecido en anteriores edicións, como a cata concurso, que se celebrará o sábado e entregará os premios o domingo. A noite do día 15 contará cun concerto, que comezará as dez, coas actuacións de A Banda da Loba e Monoulius DOP.
O domingo terá lugar o tradicional nomeamento de novos membros da Orde dos Amigos do Viño da Ulla, nomes que se coñecerán catro días antes. O pregón este ano correrá a cargo da actriz María Mera. Finalmente as actuacións ao longo de todo o día e xa no serán da Orquestra Panorama poñerán o broche a XLI Festa do Viño da Ulla.
