Bisbarra, 14 de marzo do 2024 – A Deputación da Coruña vén de adxudicar a mellora na seguridade viaria en varios tramos de estradas provinciais no concello de Vedra.
O investimento alcanza os 252.199,09 euros. Por unha banda traballarase na DP-1202, nun tramo que vai desde o velódromo ata o cruce que leva á igrexa de Vedra. Por outra parte actuarase na DP-8203 na zona que pasa por diante do concello ata o enlace coa rúa que vai ao velódromo e tamén na zona de San Xián de Sales.
O obxectivo destas actuacións é garantir a seguridade peonil nos tres tramos. En primeiro lugar, incrementarase a sinalización tanto vertical como horizontal. Aplicaranse bandas transversais de alerta e novos pasos de peóns, e colocaranse novos sinais verticais, tanto de perigo para advertir da presenza de viandantes como de velocidade máxima de circulación.
No caso de San Xián de Sales crearanse, na marxe esquerda da estrada, unha senda peonil e unha zona de aparcadoiro en liña. A senda estará ao mesmo nivel, cunha separación do estacionamento mediante delimitadores de caucho reciclado. Debido a que será necesario realizar un movemento de terras para gañar espazo suficiente, construirase un muro de contención para que se sosteña o terreo.
