Bisbarra, 5 de febreiro do 2024 – O CEIP de Ortigueira de Santa Cruz de Ribadulla, en Vedra, ven de inaugurar a súa propia biblioteca.
Este novo espazo foi posible grazas a cesión realizada polo concello de Vedra. O municipio cedeu ademais un bo número de fondos que se sumaron aos conseguidos coas axudas da Consellería de Cultura, Educación, Formación Profesional e Universidades.
O centro, ata o de agora, non dispoñía dun espazo propio para instalar unha biblioteca. Para acabar con esta situación o Concello de Vedra cedeu dúas salas nun espazo cultural de propiedade municipal situado nas inmediacións do centro de Ortigueira.
Nesta nova etapa e segundo o colexio contarán cun equipo de alumnado voluntario de 5º e 6º de primaria que axudará a converter a biblioteca escolar nun lugar para a aprendizaxe a través do desfrute, desde o cal propoñer recursos e actividades e establecer vínculos con toda a comunidade educativa.
No acto de inauguración contaron coa actuación da contacontos Raquel Queizás, e coas visitas do alumnado voluntario de 6º do CPI Plurilingüe e Vedra así como dunha asesora de bibliotecas escolares da Xunta de Galicia e de representantes do Concello de Vedra e da Anpa do CEIP de Ortigueira.
