Bisbarra, 9 de maio do 2023 – A Xunta acaba de decidir a inclusión no Catálogo galego de árbores senlleiras a formación de camelias en Vedra situada no Pazo de Ortigueira.
Xunto ás camelias de Vedra entran tamén dúas sequoias localizadas en Teo (A Coruña), e a sobreira de Outeda, situada en Barro (Pontevedra). O anuncio o realizou a conselleira de Medio Ambiente, Territorio e Vivenda, Ángeles Vázquez nunha visita ao Paz de Santa Cruz ou de Ortigueira.
Acompañada polo alcalde de Vedra, Carlos Martínez, e pola directora xeral de Patrimonio Natural, Belén do Campo, a conselleira explicou que o Catálogo galego de árbores senlleiras é unha ferramenta pública e en constante actualización, xa que poden propoñer a inclusión de elementos novos os seus propietarios, as administracións, os centros de investigación ou as asociacións e entidades públicas ou privadas que teñan entre os seus fins a protección da natureza.
Desde a aprobación do seu regulamento no ano 2007, este inventario de carácter administrativo foi obxecto de diversas revisións e periodicamente sométense a información pública novas propostas para valorar a incorporación de exemplares con valores salientables, como é o caso dos 4 elementos referidos e que acaban de recibir o informe favorable do Comité galego de árbores senlleiras.
No catálogo son susceptibles de incluírse todas aquelas árbores e formacións merecentes de protección en atención ás excepcionais características do seu porte, proporcións, idade, rareza, significación histórica ou cultural, interese científico, educativo, estético, paisaxístico ou calquera outra circunstancia que as faga merecedoras dunha especial protección.
No caso concreto da formación de camelias que visitou en Vedra, Ángeles Vázquez explicou que nela se recollen os camelios máis representativos pola súa antigüidade que hai neste Pazo, que alberga innumerables exemplares de Camellia japonica, ademais doutras especies e variedades diversas do mesmo xénero.
Ademais, indicou que grazas a esta nova incorporación ao Catálogo, o Pazo de Santa Cruz de Rivadulla contará nos seus xardíns cun total de 10 elementos senlleiros: 7 árbores e 3 formacións.
Polo que respecta ás dúas sequoias vermellas do Xirimbao, en Teo, atópanse no couto do Couso, na área recreativa do Xirimbao. O refuxio e a zona de recreo inauguráronse en 1961, polo que se considera que estes exemplares foron plantados sobre esa mesma data e teñen unha idade comprendida entre os 60 e os 70 anos, posto que se descoñece o tamaño co que foron plantadas.
