Bisbarra, 8 de novembro do 2022 – O concello de Vedra presentou este luns a iniciativa A Estación Cultural que dotará de contido aos equipamentos da vella estación de ferrocarril de Santa Cruz de Ribadulla.
O acto contou coa presenza do Conselleiro de Cultura, Román Rodríguez; o alcalde de Vedra, Carlos Martínez Carrillo; o director da Axencia Galega das Industrias Culturais, Jacobo Sutil; ademais dunha representación de agrupacións e asociacións culturais da zona e dos artistas que participarán na Estación Cultural, como Sheila Patricia ou Os da Porfía.
A Estación Cultural é unha das 14 propostas apoiadas pola Xunta de Galicia a través do fondo Territorio Cultura, que conta cunha dotación de 1,25 millóns de euros para impulsar iniciativas tanto públicas como privadas encamiñadas á dinamización de zonas non urbanas.
Tres eixes de traballo
A Estación Cultural articúlase en tres eixes. O primeiro será un laboratorio de ideas que busca unir ao tecido empresarial e asociativo coas institucións. Con proxectos concretos o laboratorio acompañará aos protagonistas desde o deseño ata a posta en marcha, asesorando e formando co obxectivo de xerar un impacto social e económico no concello. A intención é axudar no desenvolvemento do talento no ámbito cultural.
A segunda liña de traballo será a creación dun estudo de radio e podcast. O obxectivo e desenvolver unha ferramenta dinamizadora con gran capacidade de difusión. Un espazo no que os participantes aprendan sobre produción e poidan contar as súas experiencias de cada día.
A parte máis visible do proxecto será a denominada Cultura na Nave. Trátase dun ciclo de cinco festivais que se desenvolverán na nave da Estación ata o vindeiro mes de marzo. Cada un dos eventos xirará en torno a unha temática específica e contará con artistas locais, e outros recoñecidos a nivel galego, co fin de xerar un intercambio cultural.
Primeiros festivais na Estación Cultural
O primeiro de eses festivais leva o nome de Memoria e terá lugar os días 19 e 20 de novembro. Abrirase cunha mesa de experiencias sobre a memoria colectiva vedresa e dúas exposicións “Gundián, achegamento a unha paisaxe natural e humana” e “Coplas Ulláns”.
Un concerto das corais do concello, a continuación outro de Sheila Patricia e un magosto pecharán o primeiro día. A xornada do 20 dedicarase a unha ruta polo patrimonio oculto de Vedra.
Xa no mes de Nadal organizase o festival Tradición, os días tres e catro. A primeira xornada terá unha feira de artesanía, unha mesa de experiencia sobre tradicións locais, e un obradoiro de baile tradicional con Marcos Botana. Os concertos correran a cargo de Porembela, Os da Porfía e A Requinta da Laxeira rematando o día cunha foliada libre.
O día catro continuará a feira de artesanía, o espectáculo infantil “O mago Noel” e unha sesión vermú con A Gaita de Sarandón e o grupo de baile “Os Campiños”.
A Estación Cultural é un proxecto impulsado desde o concello de Vedra e que conta coa colaboración da Xunta de Galicia, o Ministerio de Cultura a través do Plan de Recuperación Transformación y Resilencia, a Unión Europea e o Xacobeo 21-22.
O conselleiro de Cultura, Educación, FP e Universidades, Román Rodríguez, visitou hoxe en Vedra as instalacións da antiga estación de tren de Santa Cruz de Ribadulla con motivo da presentación do novo proxecto A estación cultural, apoiado pola Xunta a través do programa Territorio Cultura para ampliar e diversificar a oferta cultural no rural. En concreto, a proposta do Concello vedrés é unha das 14 primeiras adxudicatarias deste fondo,
Dinamizador social
Román Rodríguez destacou a aposta do Concello de Vedra por afianzar o papel da cultura como vehículo de dinamización social e económica, ademais de catalizadora da participación cidadá. “Vedra conta a partir de agora cun espazo de creación, produción e proxección chamado a representar un pulo extra para o tecido cultural local e a actuar como un novo axente para potenciar a oferta cultural do municipio e asentar as súas empresas”, sinalou o conselleiro, quen enmarcou esta liña de traballo nos obxectivos que a Xunta persegue co desenvolvemento de Territorio Cultura.
