Sanmta Comba – 2/09/2026 – O Concello de Santa Comba condena os actos vandálicos sufridos na Casa da Mina na pa sada fin de semana. Uns descoñecidos accederon pola forza ao edificio municipal, causando danos en portas, ventás e material destinado ao futuro Museo Mineiro.
Os asaltantes subtraeron fotografías antigas, un mini proxector, unha pedra de wolframio e unha casaca de vixilante da mina. Algunhas destas pezas foran doadas por particulares para contribuír á recuperación e conservación da memoria mineira de Santa Comba. Ademais, os autores destrozaron un maniquí e unha tubaxe metálica.
Na Casa da Mina o concello de Santa Comba está a desenvolver un proxecto de recuperación e divulgación da historia mineira de Varilongo. Os descoñecidos accederon pola forza, causando desperfectos en portas e varias ventás. No interior, os danos afectaron especialmente á zona destinada ao futuro Museo Mineiro.
Máis alá do valor económico dos danos, desde o Concello sublíñase o impacto que estes feitos supoñen para un proxecto no que se leva investido moito tempo de estudo, investigación e pesquisas históricas arredor da Mina de Varilongo.
A iniciativa xa comezou, ademais, a achegar este patrimonio á sociedade a través das actividades divulgativas e visitas á Casa da Mina, nas que participan visitantes e escolares interesados en coñecer unha parte relevante da historia do municipio.
O Concello destaca tamén a implicación das persoas que colaboraron desinteresadamente co proxecto, algunhas delas cedendo obxectos da súa propiedade para contribuír á conservación e divulgación deste legado.
O alcalde, Alberto Romar, expresa a súa “máis rotunda repulsa” e confirma que os feitos xa foron postos en coñecemento da Policía Local e da Garda Civil
Alberto Romar: “É un ataque ao traballo e á ilusión de moitas persoas”
O alcalde de Santa Comba, Alberto Romar, expresa a súa “máis rotunda repulsa” ante uns feitos que cualifica como un acto de vandalismo e incivismo contra o patrimonio e a historia do municipio.
“Non estamos só ante os danos materiais ou a subtracción duns obxectos. É un ataque ao traballo e á ilusión de moitas persoas que levan tempo contribuíndo a recuperar e compartir a historia da Mina de Varilongo”, sinala o rexedor.
O Concello deixa claro que este incidente non freará o proxecto do Museo Mineiro nin os traballos para recuperar e divulgar a historia de Varilongo. A iniciativa continuará avanzando coa investigación, recuperación e divulgación do patrimonio mineiro, co obxectivo de conservar esta parte da memoria de Santa Comba e facela accesible tanto á veciñanza como ás persoas que visiten o municipio.
“Este revés non vai facer que paremos. O noso compromiso coa recuperación da memoria de Varilongo segue intacto e imos continuar traballando para que o Museo Mineiro sexa unha realidade”, afirma Alberto Romar. O Concello considera que continuar desenvolvendo o proxecto e achegando este patrimonio á sociedade é a mellor resposta ante o sucedido, mantendo o traballo iniciado para que a Mina de Varilongo ocupe o lugar que merece na memoria e no patrimonio de Santa Comba.
