Compostela, 14/04/2026 – O Café Casino de Santiago acolle hoxe, ás 12:00 horas, o acto de inauguración dunha escultura dedicada a Ramón María del Valle-Inclán. A peza foi realizada por alumnado das especialidades de escultura e modelado da Escola de Arte e Superior de Deseño Mestre Mateo da cidade, e quedará colocada de xeito permanente no histórico café compostelán.
Durante a inauguración darase a coñecer o proceso creativo da obra, un busto de Valle-Inclán, desenvolvido no ámbito docente deste centro. Un traballo que pon en valor o traballo transversal do alumnado implicado, que investigou sobre a anatomía do rostro e explorou diferentes técnicas de esmaltado e policromía ata rematar a peza, coa supervisión do profesorado.
Ramón del Valle-Inclán foi un visitante asiduo do Casino de Santiago, lugar de encontro, conversa e inspiración na súa vida compostelá. Por iso, esta escultura rende homenaxe á súa vinculación coa institución e á pegada literaria e cultural que deixou para sempre na cidade de Santiago.
Ao acto, que será conducido polo xestor cultural e investigador, Fernando Franjo, está prevista a asistencia do director do centro, Juan Adrio; os profesores Óscar Aldonza e Miguel Ángel Vigo, e autoridades locais e académicas da cidade, así como o guía e actor Suso Martínez, un dos protagonistas das visitas teatralizadas que se desenvolven no Café Casino baixo o título Café Comentado.
