O alcalde, Diego Luis Díaz, e o tenente alcalde, Antonio Negreira, mantiveron unha reunión de traballo coa conselleira de Vivenda e Planificación de Infraestruturas, María Martínez.
As infraestruturas foron o tema central que mantiveron o alcalde de Val do Dubra, Diego Luis Díaz, e o tenente alcalde, Antonio Negreira, coa conselleira de Vivenda e Planificación de Infraestruturas, María Martínez, e con Pablo Blanco, enxeñeiro técnico de Estudio Técnico Gallego.
Na reunión, o Concello de Val do Dubra solicitou unha intervención no núcleo de Portomouro para mellorar a seguridade viaria na estrada AC-455. O Concello comprometeuse a elaborar unha memoria técnica que avalíe as actuacións necesarias para incrementar a seguridade nesta vía.
Por outra banda presentaron un proxecto a medio prazo para buscar unha alternativa ao tráfico pesado que circula pola zona, especialmente o que conecta Carballo e Santa Comba con Santiago e que se ve obrigado a cruzar polo núcleo de Portomouro.
Segundo os datos de 2022, máis de 6.000 vehículos atravesan diariamente Portomouro, o que fai necesario abordar unha solución para minimizar o impacto na seguridade e na calidade de vida da veciñanza.
Outro dos temas prioritarios da reunión foi a mellora da ponte de Portomouro. Desde o Concello solicitouse á Consellería de Infraestruturas unha revisión estrutural, así como actuacións de limpeza, mantemento e conservación para garantir a súa seguridade a longo prazo.
Este encontro supón un primeiro paso para avanzar en melloras nas infraestruturas clave para Val do Dubra. O concello continuará traballando para que estas demandas se convertan en proxectos concretos nos próximos meses.
O alcalde, Diego Luís Díaz, valora esta reunión dun xeito positivo e agarda que “a Consellería de Infraestruturas poida atender estas propostas que son necesarias para Val do Dubra e tamén para a súa contorna; dada a alta afluencia de vehículos que transcorren por estas vías que son de titularidade da Xunta de Galicia e que nos conectan desde a Costa da Morte ata a capitalidade galega” así, fala da necesidade de atender ás máis urxentes e ter en conta outras “en estudos a medio prazo”.
O tenente alcalde, Antonio Negreira, reitera que se trata “dunha necesidade urxente, que implica varios concellos da contorna polo que agardamos sexa recollido nun proxecto de colaboración que garanta de forma segura e rápida a mellor desta zona”.
