O Servizo de Minas da Xunta de Galicia ampliou o prazo para presentar alegacións ao vertedoiro de Niveiro ao detectar, no último día de exposición pública, un erro na web.
A veciñanza e institucións de Val do Dubra teñen dez días máis para presentar alegacións ao proxecto de rehabilitación, peche e abandono da canteira de Niveiro que reconverterá o espazo nun vertedoiro.
A decisión tomouse despois de que a Asociación Medioambiental de Niveiro detectara un erro na páxina web oficial, onde o documento desapareceu antes de tempo o último día do período de exposición pública.
Tras detectar isto, tanto a Asociación Medioambiental de Niveiro como o Concello de Val do Dubra presentaron reclamacións ante a Sección de Minas pola retirada prematura do anuncio do proxecto no portal de transparencia da Xunta, nesa mesma data.
Estas reclamacións levaron ao Servizo de Minas da Xunta á ampliación en 10 días do prazo para presentar alegacións ao proxecto de rehabilitación, peche e abandono da canteira de Niveiro, promovido por Francisco Gómez y Cia, S.L.
Este novo prazo estenderase ata o vindeiro día 24 de marzo, polo que, aquelas persoas que aínda non tivesen presentado as súas alegacións poden facelo antes desta data.
Para facilitar o proceso, a Asociación Medioambiental de Niveiro ofrece modelos de alegacións para asinar, ademais de asesoramento sobre os pasos a seguir. As persoas interesadas poden poñerse en contacto coa asociación para recibir toda a información necesaria a través do enderezo electrónico ricardo.riveiro@niveiro.com ou do teléfono 614 217 712.
Tamén informan que a Xunta está enviando notificacións solicitando información adicional e requirimentos de información cun prazo de presentación. Se alguén precisa axuda para confeccionar a resposta ou mesmo para entender qué é o que están a solicitar, poden acudir ao Concello ou poñerse en contacto coas Asociación Medioambiental de Niveiro.
About the Author
