O concello de Val do Dubra entrará nas próximas semanas nunha intensa actividade co inicio de obras de distinto tipo.
O Concello de Val do Dubra ven de contratar un paquete de obras que supoñen un investimento total de 574.675,87 euros e que se executarán ao longo das próximas semanas.
Trátanse de actuacións moi diversas, tanto en mellora viaria como en abastecemento e servizos, co obxectivo de mellorar as infraestruturas municipais e a calidade de vida.
As principais actuacións que se levarán a cabo en Val do Dubra son o reforzo do firme no viario de Erviñou a Abelenda por 124.420 €; a mellora do acceso ao CEIP de Portomouro e senda na rúa Freán por 51.576,56 €; a mellora do viario de Portomedal e outros por 108.420,01 €; a mellora viaria de Pedragosa a Barral por Algalia e outro cun custo de 121.483,38 €; a ampliación do abastecemento a Gontar por 56.890,11 €; melloras no aparcadoiro de Bembibre por 36.395,95 €; abastecemento en Buiro por 41.739,86 €; a obra no paso en A Tilleira por 17.750 € e a mellora viaria en Arnexo e outros por 16.000 €.
O alcalde de Val do Dubra, Diego Luis Díaz, salientou a capacidade de xestión da administración, que está a licitar obras a un bo ritmo. De feito xa está licitada a totalidade das actuacións incluídas no Plan de Obras 2024 e a piques de iniciar a tramitación das correspondentes a este exercicio.
Díaz indica ademais que estas intervencións “darán resposta a necesidades demandadas pola veciñanza nas distintas parroquias e permitirán mellorar a rede de infraestruturas locais, tanto no ámbito das comunicacións como no do abastecemento”.
Pola súa parte o o tenente de alcalde e responsable da área de Obras, Antonio. Negreira, indicou que se trata do maior investimento realizado en infraestruturas municipais nos últimos anos. “É unha clara aposta polo rural, xa que estas actuacións van permitir mellorar de maneira considerable o acceso aos núcleos rurais do Concello. Ademais, contribuirán a incrementar a calidade de vida da veciñanza e a facer das nosas aldeas un lugar máis atractivo, tanto para captar nova poboación como para animar aos actuais propietarios de vivendas a acometer obras de mellora e rehabilitación, cada vez máis demandadas na actualidade”, sinalou.
O Concello prevé que as obras dean comezo de xeito inmediato e estarán coordinadas para minimizar as molestias ao tráfico e aos residentes durante a súa execución.
