Bisbarra, 26 de xullo do 2023 – O concello de Val do Dubra colocou un pequeno monólito xunto ao centro de saúde coma homenaxe a todos os que colaboraron a superar a pandemia.
No acto participou o Ministro de Sanidade, José Miñones, que trasladou o agradecemento do Goberno e de toda a sociedade española “aos miles e miles de persoas” que deron o mellor de si mesmas “para salvarnos”, facendo fronte á pandemia
Miñones destacou esta iniciativa do Concello de Val do Dubra e animou a outros municipios a seguir o seu exemplo. Enxalzou ademais o traballo que desenvolveron todos os profesionais dos servizos sanitarios, desde o persoal médico, pasando polo de Enfermaría, auxiliares, do transporte sanitario, farmacias, laboratorios ou o persoal de limpeza e cociñas, entre outros.
O ministro de Sanidade visitou previamente o concello de Val do Dubra, onde foi recibido polo seu alcalde, Diego Luís Díaz, e o primeiro tenente de alcalde, Antonio Negreira. Ali asinou no Libro de Honra da localidade. No acto de homenaxe tamén participou a xerente do Servizo Galego de Saúde (SERGAS), Estrela López-Pardo; e representantes do Centro de Saúde Bembibre de Val do Dubra.
José Miñones destacou tamén o “titánico esforzo colectivo” realizado pola sociedade española para conter a pandemia e as súas consecuencias socioeconómicas, e tivo palabras de recordo para todas as persoas que faleceron a causa do virus.
