Bisbarra, 23 de setembro do 2024 – O Concello de Val do Dubra aprobou, con 6 votos a favor do PSOE e ANOVA e 4 abstencións do PP, o Convenio Colectivo do persoal laboral ao servizo do municipio.
Este Convenio é nunha ferramenta que nunca chegou a ter vixencia en Val do Dubra ata o momento, pese a unha aprobación que se levara a cabo no mandato 2015 -2019 e que nunca entrou en vigor e despregou os seus efectos.
A aprobación ten respaldo orzamentario, cunha partida orzamentaria de 50.000€, que xa se contemplaba nos Orzamentos aprobados para o ano 2024, e que se destinaran a facer fronte ás cantidades económicas que veñen estipuladas para lograr a equiparación.
O convenio aprobado representa un paso adiante cara á dignificación e mellora das condicións laborais dun amplo número de traballadores e traballadoras municipais.
Respecto ao aspecto retributivo, máis alá do incremento salarial, o novo convenio establece un sistema retributivo único para todo o persoal laboral, baseado en criterios obxectivos e en función da súa clasificación profesional.
Deste xeito, elimínanse as diferenciacións inxustificadas que existían ata agora. Ademais, créase un sistema de clasificación profesional único e común para todo o persoal laboral, asimilado ao do persoal funcionario.
De carácter xeral, o Convenio formaliza e recoñece legalmente a equiparación do persoal laboral municipal co persoal funcionario en canto a condicións e dereitos laborais básicos. Entre estes, destacan a xornada laboral, permisos, licenzas e o acceso á carreira profesional, garantindo que ambos colectivos gocen de dereitos laborais idénticos.
Esta proposta emana do acordo de goberno asinado entre o Partido Socialista de Val do Dubra e ANOVA.
Con esta medida, o goberno municipal reafirma o seu compromiso coa mellora das condicións laborais no Concello e co avance cara a un modelo de xestión máis equitativo e xusto para todos os empregados públicos.
En paralelo tamén se comezará a traballar nunha RPT que se pretende que tamén inclúa e defina os postos de persoal laboral e dos funcionarios.
