Bisbarra, 6 de marzo do 2025 – O BNG levou ao Parlamento de Galicia as demandas da veciñanza de Val do Dubra sobre o vertedoiro de Niveiro, que se quere construír en Val do Dubra.
A deputada Iria Carreira reclamou ao PP que escoite á veciñanza e non autorice a implantación do vertedoiro de Niveiro, despois da clara oposición social dos últimos meses e da preocupación que se veu incrementada coa publicación no DOGA do proxecto de rehabilitación, peche e abandono da canteira.
Carreira criticou, diante do director xeral de Planificación Enerxética e Recursos Naturais, Pablo Fernández Vila, a xestión “cando menos mellorable” de residuos en Galiza que, “en 2025, ten que ir máis aló de acumular residuos no monte e enterralos”.
Carreira engadiu que “A Xunta do PP ten un serio problema coa xestión de residuos, coa falta de compromiso co medio ambiente e coa procura de alternativas máis sostibles e máis respectuosas, e cos vertedoiros que temos por todo o País, no sentido literal coma no figurado”.
A Deputada nacionalista advertiu que co anuncio de implantar un vertedoiro na antiga canteira de Pedra Facha, a veciñanza de Niveiro está a asistir “a unha nova ameaza que suporía graves impactos no territorio tanto a nivel paisaxístico, como medioambiental e económico”.
Esta construción suporía unha perda na calidade do aire debido á recolección, transporte e depósito do lixo, con malos cheiros e emisión de gases contaminantes. Tamén estragaría as augas superficiais e o solo, destruiría o terreo circundante e o medio natural , e por suposto, repercutiría na perda do valor paisaxístico da contorna, advertiu.
Neste senso apuntou que a contaminación da auga e do solo “non é menor”, porque pode supor un detrimento da calidade dos cultivos e a perda de valor do terreo próximo, tanto no Concello do Val do Dubra coma no veciño de Trazo, lembrando que neste monte nace un dos afluentes do río Dubra, polo que o risco de contaminación fluvial podería chegar a afectar tamén ao río Tambre.
Carreira advertiu ademais dos efectos nocivos que o vertedoiro de Pedra Facha tería na saúde humana e ambiental de Niveiro, onde están censadas preto de 300 persoas, distribuídas en nove núcleos de poboación, situándose a menos de un km da parcela do vertedoiro A Pedregosa, A torre Branca, A Algaría, O Barral e O Vilar, nos que se verían afectadas arredor de un cento de veciñas e veciños.
Efectos como a perda de confort sonoro, o empeoramento da mobilidade da zona, o aumento da inseguridade viaria, o tráfico elevado de vehículos pesados ou o deterioro das vías. En canto ás consecuencias sobre a saúde humana, destacou que pode supoñer un foco de infeccións debido a presenza de sustancias en putrefacción e por atraer ratas e outros animais que poidan actuar como vectores de enfermidades que alcancen á poboación.
Tamén suporía un impacto económico sobre unha parroquia eminentemente gandeira debido ao risco de contaminación dos cultivos e das augas destinadas ás 600 cabezas de gando vacún e de leite en Niveiro, que constitúen unha sexta parte das mil que existen en todo o concello do Val do Dubra, e que son fundamentais para a supervivencia da zona.
A deputada nacionalista recordou na súa intervención que a canteira Pedra Facha botou a andar no ano 1980 ocupando 89.000 metros cúbicos e que a actividade extractiva na mesma prolongouse ata comezos deste século. Subliñou que, aínda que a orografía está modificada, a natureza foi gañando terreo recuperando e restaurando polos seus propios medios a agresión sufrida.
É unha zona na que se pode ver o lobo ou o raposo, mais ras e outros anfibios, libeliñas e cabaliños do demo, quirópteros e diversas aves. Tamén na flora, existindo un cento de especies vexetais diferentes, algunhas delas subespecies escasas.
