Bisbarra, 5 de xaneiro do 2025 – En Galicia poden aínda existir máis de 1000 alvarizas, espazos nos que as colmeas estaban protexidas das ataques dos animais. A Asociación “Vagalumes” presentará o vindeiro día 11 o libro “Catálogo das alvarizas de Terra de Deza e Serra do Candán” de Damián Porto e Francisco Azurmendi.
https://upload.wikimedia.org/wikipedia/commons/9/90/Protexendo_a_mel_dos_osos_-_panoramio.jpg
A cita no MOMA da Estrada as oito da tarde. Na presentación participarán os autores xunto coa apicultora Mar Brea. Este traballo sobre as alvarizas está editada pola Asociación Cultural “Vagalumes” e conta cunha subvención da Deputación de Pontevedra.
No acto lembrarase a importancia e das características históricas da produción de mel na comarca do Deza. A produtora convidada, Mar Brea, ven de recibir en Londres o premio á mellor calidade no certame internacional “London International Honey Awards”.
“Catálogo das alvarizas de Terra de Deza e Serra do Candán” é un estudo das alvarizas da zona norte da provincia de Pontevedra, abranguendo desde os Concellos de Forcarei até Vila de Cruces e Dozón, pasando por Lalín e Silleda e centrándose fundamentalmente na serra do Candán e no val do río Deza.
A metodoloxía que se usou para a identificación das alvarizas da serra do Candán e Terra de Deza esixiu compatibilizar, ao longo de varios anos e de ímprobos esforzos a pé de campo, a recollida de notas e apuntamentos con traballos informáticos de tratamento de bases de datos, textos e imaxes.
De todos xeitos os investigadores teñen claro que as alvarizas recollidas neste catálogo non poden ser a totalidade das existentes nos espazos naturais examinados e tiveron que existir máis. Este estudo servirá como primeiro paso para futuros estudos que completen a realidade de estas construcións.
O catalogo de alvarizas ofrece a localización da construción vía satélite coas súas coordenadas e altitude, medición e delimitación dos valos e paramentos, toma de fotografías, anotación das especies florais asociadas e da contorna, determinación do estado de conservación e/ou explotación e uso do ben… non sempre doados de executar debido á situación ou ao estado das vías de acceso dalgunhas delas.
O obxectivo era elaborar as precisas bases de datos relacionais que proporcionasen, cando menos, unha imaxe de conxunto desta parte do patrimonio histórico e cultural de Galicia con todos os seus datos e referencias.
O formato da publicación ten dúas partes. Unha primeira introdutoria ao tema, cunha análise do que historicamente representou a produción de mel e a elaboración destas construcións nas comarcas estudadas; e logo, unha segunda parte, que consistiría nas fichas de cada unha das alvarizas investigadas.
A intención dos editores e autores, para a promoción e difusión da publicación, é levar a cabo actividades de presentación e roteiros para visitar esta creación da arte vernácula que forma parte do patrimonio arquitectónico de Galicia.
