Compostela, 16 de xaneiro do 2023 – Desde o pasado venres o Museo de Historia Natural da USC mostra o meteorito Traspena despois de dous anos de traballo e xestións.
Un asteroide de 1,15 metros de tamaño e 2,62 toneladas de masa chocou contra a atmosfera o 18 de xaneiro do 2020. A fragmentación produciu un meteorito de 527 gramos, o meteorito de Traspena agora exposto no MHN.
O acto estivo presidido polo reitor Antonio López e serviu para dar conta do achado e da posterior investigación liderada pola Área de Astronomía e Astrofísica do Departamento de Matemática Aplicada na EPS de Enxeñaría do Campus de Lugo. Participaron ademais o vicerreitor de Política Científica, Vicente Pérez Muñuzuri; do director do MHN, Marcos A. González González; do director do Observatorio Astronómico ‘Ramón María Aller’ da USC, José A. Docobo Durántez; e do profesor da Área de Astronomía e Astrofísica da USC, Manuel Andrade Baliño.
Dous anos de traballo
No ano 2009 a USC compraba dous equipos de gravación en vídeo para a observación do ceo. Un colocouse no observatorio Ramón María Aller, no Campus de Santiago, e outro na Escola Politécnica Superior de Enxeñaría do Campus Terra, en Lugo. Grazas aos datos obtidos en esas gravacións levouse a cabo unha investigación que explicou o profesor Manuel Andrade, responsable científico do estudo, que salientou a singularidade deste fenómeno que permitiu non só recuperar este fragmento de asteroide senón acometer unha análise detallada da súa natureza e composición e determinar con exactitude a súa traxectoria.
O traballo foi tan coidadoso que non se conformaron co máis “profesional” e decidiron converter o estoupido rexistrado nun son musical
Da importancia do que se viu no ceo hai dous anos da mostra o feito de que en esa mesma xornada os vídeos foron solicitados desde o estranxeiro, como explicou o director do observatorio José Ángel Docobo
Ás dificultades da investigación sumouse a pandemia. Docobo narrou que o simple feito de desprazarse a Lugo en pleno confinamento, para tentar localizar o fragmento de meteorito, precisou de permisos especiais da USC e cando chegaron á zona… xa había xente de fora de Galicia coa mesma misión.
Non foi só a investigación que determinou a órbita, ou atopar o meteorito; como explicou o director do Museo de Historia Natural, Marcos A. González, tívose que conseguir que o Museo se convertera en repositorio internacional de meteoritos para poder acollelo e darlle nome
O Reitor, Antonio López, rematou o acto cunha curiosa anécdota vinculada aos estudos de dereito. Un vello profesor da USC escribiu no seu día un artigo sobre as implicacións legais da caída dun meteorito. A doutrina Lois, na honra do profesor, chegou a usarse no Tribunal Supremo dos Estados Unidos.
O meteorito Traspena é un fito que, a dicir dos expertos, non se repetirá en 700 anos. Unha oportunidade para poñer en valor aos investigadores da USC e ao Museo de Historia Natural, as veces esquecido pero que é sen dúbida un dos valores da cidade.
O estudo pode lerse no seguinte enlace ‘O meteorito de Traspena: órbita heliocéntrica, traxectoria atmosférica, campo de dispersión, e petrografía dun novo condrito ordinario L5’.
