A Universidade de Santiago realizará un informe para a Federación Galega de Municipios e Provincias sobre o financiamento local
O financiamento dos concellos é o principal problema dos municipios xa que todo depende del. Na maioría dos casos os concellos non poden acometer ningunha mellora sen axuda de outras administracións o que limita a súa independencia.
Trátase dun modelo que ven de cumprir vinte anos e a Federación Galega de Municipios e Provincias (FEGAMP) busca un cambio co apoio dos expertos da USC. Ambas institucións veñen de asinar un acordo para que un equipo da Facultade de Ciencias Económicas e Empresariais realice un informe sobre a situación actual do financiamento municipal.
O contrato polo que se rexe esta colaboración asinárono este martes en San Xerome o reitor Antonio López e o presidente da FEGAMP, Alberto Varela. O reitor dixo estar moi satisfeito “A transferencia de coñecemento é unha das nosas misións e, neste caso, trátase de poñer o noso coñecemento ao servizo da administración local para que poida apoiar nos nosos estudos as súas demandas para reivindicacións lexítimas como a do financiamento”.
Pola súa banda Alberto Varela manifestou a súa seguridade por que “van poñer luz e solucións para resolver as dificultades de xestión que os concellos padecemos por non recibir o financiamento público que nos corresponde, e que é necesario para poder atender dignamente o desenvolvemento das nosas competencias e servizos”.
Un ano de traballo por un equipo reputado
O responsable do desenvolvemento do traballo por parte da USC será o profesor Xoaquín Fernández Leiceaga, adscrito ao CISPAC, que na coordinación contará coa colaboración de Santiago Lago Peñas, da USC, e de Javier Suárez Pandiello, da Universidade de Oviedo, aos que acompañará un equipo de persoal experto reputado que deberá ter rematado o traballo a finais de ano.
Tal e como explicou o director do proxecto no acto de sinatura, neste tempo os concellos deben asumir novos requirimentos, “e polo tanto poñer en marcha políticas complementarias”, por parte doutras administracións -singularmente no ámbito dos servizos sociais ou da xestión do territorio- “e dunha cidadanía cada vez máis consciente das súas necesidades, á vez que modernizar os seus modos de atención”.
Para Leiceaga, o modelo actual “non resolveu o problema de inequidade entre uns concellos e outros e limitou a autonomía tributaria municipal”. Engade que “foi complementado por mecanismos de garantía da estabilidade orzamentaria, que impiden o uso dos remanentes aínda que o municipal é o nivel de administración máis saneado e que apenas suma ao déficit público global”.
A isto o profesor da USC súmalle que o actual modelo vai “acompañado” de recursos autonómicos “que adolecen de falla de automatismo e discrecionalidade e dunha limitada actualización”.
Deste xeito, o traballo pretende dotar á FEGAMP de ferramentas para activar estes debates, con propostas realistas baseadas no coñecemento científico. Como exemplos, o equipo que está a realizar o traballo sinala como a flexibilización no uso dos remanentes axudaría á modernización municipal ou como a adecuación dos ingresos tributarios aos novos marcos no uso da auga ou no tratamento dos residuos facilitaría a súa xestión eficiente.
Achegas dende Galicia
O informe ‘A reforma do financiamento local. Achegas desde Galicia’ parte dunha diagnose da situación para logo profundar en distintos apartados nos tributos locais, na introdución dun concepto explícito de equidade na participación nos ingresos do estado nos pequenos concellos, no financiamento autonómico das entidades locais, na taxa turística ou na reforma das normas de estabilidade. O documento rematará cunha serie de propostas a ter en conta nun posible cambio de modelo.
