Compostela, 21 de xuño do 2022 – O Colexio de Fonseca acolle, ata o 16 de setembro, a mostra “A Universidade pintada”. A mirada de Isabel Rey sobre o patrimonio arquitectónico da USC.
A Universidade Pintada está composta por 28 obras de gran formato, realizadas en acrílico sobre táboa, e sete pezas menores executadas sobre lenzo. A exposición pode visitarse de balde no Claustro Alto do Colexio de Fonseca de luns a venres, entre as 11.00 e as a 14.00 horas, en quenda de mañá, e de 17.00 a 20.30 horas, en quenda de tarde.
.
A exposición estrutúrase en catro bloques que se corresponden co emprazamento físico dos edificios retratados: edificios históricos, Campus Norte, Campus Sur e Campus de Lugo. O proxecto combina o goce estético da exposición co acceso a contidos complementarios sobre a historia dos edificios, como imaxes e documentos procedentes do Arquivo Histórico Universitario, aos que se pode acceder a través de códigos QR.
