Compostela, 14 de febreiro do 2023 – A Facultade de Medicina de Santiago acolle estes días unha mostra fotográfica sobre a vida cotiá das persoas con dano cerebral adquirido.
Trátase dun traballo do fotógrafo compostelán Aigi Boga, e impulsada pola Federación Galega de Dano Cerebral. Leva por título “Punto e seguido. A vida despois do dano cerebral adquirido” e estará aberta ata o vindeiro día 28 de 8 da mañá a dez da noite.
As fotografías que compoñen a mostra realizáronse nas cinco asociacións que forman parte da Federación Galega de Dano Cerebral. Protagonizadas polas persoas usuarias de ADACECO, ADACE Lugo, Alento, DCA Ourense e Sarela, as imaxes amosan a súa vida cotiá, as actividades que realizan ou a súa convivencia, é dicir, a vida despois do “punto e seguido” ao padecer un ictus, un traumatismo cranioencefálico, ou calquera outra das causas do dano cerebral adquirido.
Para acompañar a exposición, FEGADACE realizou unha serie de vídeos curtos que contan con diferentes testemuños de persoas con dano cerebral, familiares e profesionais das entidades. Son un total de sete vídeos, cunha peza principal e seis máis pequenas, que crean un retrato da complexidade de secuelas que compoñen o dano cerebral: físicas, sensoriais, económicas, cognitivas, sociais, ou orgánicas, entre outras.
A organización da exposición conta coa colaboración da USC e co financiamento da Consellería de Política Social, dentro dos programas con cargo á asignación tributaria do 0,7% do IRPF; é dicir, grazas ás persoas que marcan a X Solidaria na súa declaración da renda.
A Facultade de Medicina e Odontoloxía e FEGADACE colaboran desde hai anos elaborado conxuntamente materiais formativos e divulgativos, unha páxina web e actividades de capacitación en hixiene bucodental dirixidas ás familias e ás persoas usuarias das asociacións de dano cerebral (ata o momento realizadas en Alento e Sarela). Ademais, a Unidade recibiu en 2019 o Premio FEGADACE – Miguel Blanco.
