Trátase da nova peza da Aula de Teatro da Universidade de Santiago de Compostela e estará este martes e mércores na Sala de Teatro Roberto Vidal Bolaño da USC.
A Aula de Teatro da USC presentará por última vez este martes 10 e mércores 11 a peza “Agamenón, volvín do supermercado e deille unha malleira ao meu fillo”, de Rodrigo García, con posta en escena de Roberto Salgueiro e cun elenco composto por Antón Torrado Puime, Lucía Casal Muñiz e Laura Valeiras.
A actuación será ás 21.00 horas na Sala de Teatro Roberto Vidal Bolaño (na AV. De Vigo no Campus Sur) previa recollida de entrada a partir das 20.30 horas no mesmo espazo. Despois das funcións haberá un encontro co público.
Sobre a obra
“A proposta que realizamos parte do texto orixinal de Rodrigo García, lixeiramente adaptado e onde tamén se inclúe algún outro escrito do autor. Neste peza convive unha mestura de violencia e humor que retrata unha sociedade afeita a recibir o golpe e a aceptar a derrota, asumila como algo constitutivo do noso ser. E converter a risa nun xesto revirado, a gargallada nun corpo contraído”, explican dende a Aula de Teatro da USC á hora de definir o eixo sobre o que se artella a obra.
