Compostela, 27 de maio do 2024 – A Universidade traballa para garantir a seguridade estrutural da facultade de Xeografía e Historia logo dos danos atopados no edificio.
Os danos atopados na cara superior do forzado do baixo cuberta, na zona de depósito de libros sobre a sala de lectura principal da biblioteca, obrigan ao traslado dos fondos bibliográficos de Xeografía e Historia, arredor de 145.000 volumes.
Co fin de atopar solucións o xerente da Universidade de Santiago, Javier Ferreira, e o decano da Facultade de Xeografía e Historia, Marco Virgilio García Quintela, mantiveron xa unha xuntanza co delegado do Goberno en Galicia, Pedro Blanco, para desenvolver un plan que permita garantir canto antes a seguridade do edificio.
Trátase dunha intervención urxente que debe implicar como primeiro paso a descarga de peso para reducir o volume de libros almacenados así como o cambio de dirección dos andeis de acordo cun informe técnico elaborado recentemente para avaliar a situación dada a gravidade.
Esta actuación sería a primeira fase dunha intervención integral no conxunto da biblioteca, orzamentada en 6,78 millóns de euros, que garantiría a seguridade estrutural así como a mellora do comportamento enerxético destes espazos e a racionalidade de uso das estancias.
A xuntanza súmase ao chamamento realizado dende a USC a todas as institucións do Consorcio de Santiago de Compostela (Concello de Santiago, Xunta de Galicia e Goberno de España), autor do Plan Director da Facultade que contempla a necesidade de acometer unha profunda reforma do edificio, afectado no só polo paso do tempo senón tamén por deficiencias estruturais que afectan a seguridade e a habitabilidade do edificio.
