Arzúa, 22/04/2026 – O Concello de Arzúa organiza un concerto do grupo Unto Vello este sábado na Casa da Cultura. O grupo presentará o seu disco de debut que leva por título “Inmaterial”.
A actuación de Unto Vello será este sábado, 25 de abril, ás 20:30 h. con entrada libre e gratuíta ata completar a capacidade. A apertura de portas ao público farase ás 20:00 h.
O álbum de Unto Vello, xa dispoñible en plataformas dixitais, recompila cantares tradicionais recollidos por todo o país nun intenso labor de investigación e reinterpretación do patrimonio inmaterial galego.
É a estrea discográfica do dúo formado por Bieito Pereira e Xabi Gómez, que conta coa produción de Hevi e a colaboración dos Pandeireteiros do Fiadeiro, Saínza Piñeiro, Lina e Lola e Julia e Luz Divina.
No seu ano de traxectoria, o dúo recibiu nomeamentos a premios como os Youtubeiras 2025 e os Martín Códax na categoría de música tradicional e ofreceu máis de 25 concertos en lugares como a Sala Capitol onde esgotou as entradas.
O Concelleiro de Cultura, José Luís García, convida ao público “a asistir a este importante concerto que visibiliza o legado patrimonial e cultural da nosa terra, así como a gran proxección deste dúo do que Arzúa se sinte especialmente orgullosa por contar con Bieito Pereira, que desde Brandeso leva anos realizando un destacado labor a favor do coñecemento e promoción da tradición oral e musical galega”.
